Friday, August 5, 2011

ਭਗੀਰਥ



ਭਗੀਰਥ ਹਿੰਦੀ ਲਘੁਕਥਾ ਨਾਲ ਸ਼ੁਰੂਆਤੀ ਦੌਰ ਤੋਂ ਜੁੜੇ ਹੋਏ ਲੇਖਕ ਹਨ। ਲਘੁਕਥਾ ਸਾਹਿਤ  ਦੇ ਖੇਤਰ ਵਿੱਚ ਲੇਖਕ, ਸੰਪਾਦਕ ਤੇ ਆਲੋਚਕ ਵੱਜੋਂ ਉਹਨਾਂ ਦਾ ਕੰਮ ਬਹੁਤ ਮਹੱਤਵਪੂਰਨ ਹੈ। ਲੇਖਕ ਦੇ ਪਰੀਚੈ ਨਾਲ ਕੁਝ ਰਚਨਾਵਾਂ ਪ੍ਰਸਤੁਤ ਹਨ–ਅਗਰਵਾਲ
*******

 ਜਨਮ : 2 ਜੁਲਾਈ, 1944 (ਸੇਵਾੜੀ, ਪਾਲੀ, ਰਾਜਸਥਾਨ)
ਸਿੱਖਿਆ : ਬੀ.ਐਸ.ਸੀ., ਬੀ.ਐੱਡ., ਐਲ.ਐਲ.ਬੀ., ਐਮ.ਏ.(ਰਾਜਨੀਤੀ ਸ਼ਾਸਤਰ/ਅਰਥ ਸ਼ਾਸਤਰ)
ਪ੍ਰਮੁਖ ਵਿਧਾਵਾਂ : ਲਘੁਕਥਾ, ਵਿਅੰਗ
ਮੌਲਿਕ ਪੁਸਤਕਾਂ : ਪੇਟ ਸਬਕੇ ਹੈ( ਲਘੁਕਥਾ ਸੰਗ੍ਰਹਿ),
ਸੰਪਾਦਨ : ਲਘੁਕਥਾ ਦੇ ਪਹਿਲੇ ਸੰਗ੍ਰਹਿ ‘ਗੁਫਾਓਂ ਸੇ ਮੈਦਾਨ ਕੀ ਔਰ’ ਤੇ ਵੱਖ-ਵੱਖ ਰਾਜਾਂ ਦੇ ਪ੍ਰਮੁੱਖ ਲੇਖਕਾਂ ਨੂੰ  ਕਈ ਲਘੁਕਥਾ ਸੰਗ੍ਰਹਿ(ਆਲੋਚਨਾ ਸਹਿਤ) ਪ੍ਰਕਾਸ਼ਿਤ                                                    
ਸਨਮਾਨ:‘ਮਾਤਾ ਸਰਬਤੀ ਦੇਵੀ ਸਮ੍ਰਿਤੀ ਸਨਮਾਨ’, ‘ਪ੍ਰਿੰ. ਭਗਤ ਸਿੰਘ ਸੇਖੋਂ ਯਾਦਗਾਰੀ ਸਨਮਾਨ’ ਸਹਿਤ ਕਈ ਹੋਰ ਸਨਮਾਨ।
ਸੰਪਰਕ: 228, ਮਾਡਰਨ ਪਬਲਿਕ ਸਕੂਲ, ਨਯਾ ਬਾਜ਼ਾਰ, ਰਾਵਤਭਾਟਾ, ਵਾਇਆ ਕੋਟਾ(ਰਾਜਸਥਾਨ)-323305
ਫੋਨ: 01475-233241   ਮੋਬਾਈਲ: 09414317654
                                                  *****

ਸਿੱਖਿਆ
ਅਧਿਆਪਕ ਨੇ ਅੰਗਰੇਜ਼ੀ ਦਾ ਨਵਾਂ ਪਾਠ ਸ਼ੁਰੂ ਕਰਨ ਤੋਂ ਪਹਿਲਾਂ ਵਿਦਿਆਰਥੀਆਂ ਤੋਂ ਪੁੱਛਿਆ, ਹੋਮਵਰਕ ਕਰ ਲਿਆ?
ਚਾਲੀਆਂ ਵਿੱਚੋਂ ਦਸ ਬੱਚਿਆਂ ਨੇ ਕਿਹਾ, ਹਾਂ ਸਰ, ਕਰ ਲਿਆ।
ਬਾਕੀ ਸਾਰੇ ਬੱਚੇ ਚੁੱਪ ਰਹੇ। ਅਧਿਆਪਕ ਨੇ ਉਹਨਾਂ ਸਾਰੇ ਬੱਚਿਆ ਨੂੰ ਖੜੇ ਹੋਣ ਦਾ ਆਦੇਸ਼ ਦਿੱਤਾ ਜਿਹੜੇ ਹੋਮਵਰਕ ਕਰਕੇ ਨਹੀਂ ਆਏ ਸਨ। ਹੁਣ ਉਹ ਇੰਜ ਸਵਾਲ ਪੁੱਛਣ ਲੱਗਾ ਜਿਵੇਂ ਥਾਣੇਦਾਰ ਕਿਸੇ ਅਪਰਾਧੀ ਤੋਂ ਪੁੱਛਦਾ ਹੈ।
ਹੋਮਵਰਕ ਕਿਉਂ ਨਹੀਂ ਕੀਤਾ?ਅਧਿਆਪਕ ਨੇ ਇਕ ਤੋਂ ਕੜਕ ਕੇ ਪੁੱਛਿਆ।
ਵਿਦਿਆਰਥੀ ਚੁੱਪ। ਦੂਜੇ ਸਾਰੇ ਬੱਚੇ ਵੀ ਸਹਿਮ ਗਏ।
ਮੈਂ ਪੁੱਛਦਾ ਹਾਂ, ਹੋਮਵਰਕ ਕਿਉਂ ਨਹੀਂ ਕੀਤਾ?
ਉਹ ਫਿਰ ਚੁੱਪ।
ਓਏ ਢੀਠਾ, ਬੋਲਦਾ ਕਿਉਂ ਨਹੀਂ? ਕੀ ਜਬਾਨ ਵੱਢੀ ਗਈ? ਉਂਜ ਕਲਾਸ ਨੂੰ ਤਾਂ ਸਿਰ ’ਤੇ ਚੱਕੀ ਰੱਖਣਗੇ, ਪਰ ਪੜ੍ਹਾਈ-ਲਿਖਾਈ ਦੀ ਗੱਲ ਆਉਂਦੇ ਹੀ ਇਨ੍ਹਾਂ ਦੀ ਨਾਨੀ ਮਰ ਜਾਂਦੀ ਐ। ਬੋਲ, ਹੋਮਵਰਕ ਕਿਉਂ ਨਹੀ ਕੀਤਾ?
ਸਰ, ਭੁੱਲ ਗਿਆ! ਸੁਰੇਸ਼ ਨੇ ਡਰਦੇ-ਡਰਦੇ ਕਿਹਾ।
ਵਾਹ! ਭੁੱਲ ਗਿਆ। ਸਾਹਬਜਾਦੇ ਭੁੱਲ ਗਏ। ਰੋਟੀ ਖਾਣੀ ਕਿਉਂ ਨਹੀਂ ਭੁੱਲਿਆ? ਕਪੜੇ ਪਾਉਣੇ ਕਿਉਂ ਨਹੀਂ ਭੁੱਲਿਆ? ਦੱਸ!ਅਧਿਆਪਕ ਨੇ ਉਹਦਾ ਮਖੌਲ ਉਡਾਉਂਦੇ ਹੋਏ ਕਿਹਾ।
ਮੁੰਡਾ ਸਿਰ ਝੁਕਾ ਕੇ ਖੜਾ ਰਿਹਾ, ਅਪਰਾਧ-ਬੋਧ ਨਾਲ ਗ੍ਰਸਤ। ਅਧਿਆਪਕ ਦੂਜੇ ਬੱਚੇ ਕੋਲ ਗਿਆ।
ਓਏ ਕੁੰਦਨਾਂ, ਤੂੰ ਹੋਮਵਰਕ ਕਿਉਂ ਨਹੀਂ ਕੀਤਾ ਓਏ?
ਸਰ, ਮੈਥ ਦਾ ਕੰਮ ਬਹੁਤ ਸੀ। ਟਾਈਮ ਹੀ ਨਹੀਂ ਮਿਲਿਆ।
ਅੱਛਾ!…ਤਾਂ ਤੂੰ ਮੈਥ ਦਾ ਕੰਮ ਕਰਦਾ ਰਿਹਾ। ਇੰਗਲਿਸ਼ ਤੈਨੂੰ ਵੱਢਦੀ ਐ। ਇਹਦੇ ਲਈ ਤੇਰੇ ਕੋਲ ਟਾਈਮ ਹੀ ਨਹੀਂ। ਨਾ ਦਿਓ ਟਾਈਮ। ਇੰਗਲਿਸ਼ ਆਪਣਾ ਭੁਗਤਾਨ ਆਪ ਕਰਾ ਲੂ ਬੱਚੂ, ਸਮਝਿਆ।ਅਧਿਆਪਕ ਨੇ ਧਮਕੀ ਦਿੱਤੀ।
ਅਧਿਆਪਕ ਤੀਜੇ ਬੱਚੇ ਵੱਲ ਹੋਇਆ।
ਕਿਉਂ ਬਦ੍ਰੀ ਪ੍ਰਸਾਦ ਜੀ, ਤੁਸੀਂ ਕੰਮ ਕਿਉਂ ਨਹੀਂ ਕੀਤਾ?
ਸਰ, ਕੰਮ ਤਾਂ ਕੀਤਾ ਐ, ਪਰ ਕਾਪੀ ਘਰ ਭੁੱਲ ਆਇਆ।
ਵਾਹ! ਕੀ ਕਹਿਣਾ। ਕਿੰਨਾ ਸੋਹਣਾ ਬਹਾਨਾ ਬਣਾਇਐ। ਤੂੰ ਜ਼ਰੂਰ ਲੀਡਰ ਬਣੇਗਾ। ਪੜ੍ਹਨ ਦਾ ਕੀ ਲਾਭ ਐ। ਜਾ ਤੇ ਐਮ. ਐਲ. ਏ. ਦਾ ਇਲੈਕਸ਼ਨ ਲੜ।
ਤੇ ਤੇਰਾ ਕੀ ਕਹਿਣਾ ਹੈ?ਚੌਥੇ ਵਿਦਿਆਰਥੀ ਕੋਲ ਜਾ ਕੇ ਉਹਨੇ ਪੁੱਛਿਆ।
……
ਤੂੰ ਕੀ ਬੋਲੇਂਗਾ। ਸਾਰਾ ਦਿਨ ਅਮਰੂਦ ਤੋੜਨ ਦੇ ਚੱਕਰ ’ਚ ਮਾਰਿਆ-ਮਾਰਿਆ ਫਿਰਦਾ ਰਿਹਾ ਹੋਵੇਂਗਾ, ਜਾਂ ਫਿਰ ਬੰਟੇ ਖੇਡਦਾ ਰਿਹਾ ਹੋਵੇਂਗਾ। ਤੈਨੂੰ ਟਾਈਮ ਕਿੱਥੋਂ ਮਿਲੂਗਾ? ਚੋਰ-ਉਚੱਕੇ ਬਣੋਗੇ। ਪਿਓ ਦਾ ਨਾਂ ਰੋਸ਼ਨ ਕਰੋਗੇ। ਕਰੋ, ਮੈਨੂੰ ਕੀ।
ਦਿਨੇਸ਼, ਤੂੰ ਤਾਂ ਚੰਗਾ ਮੁੰਡਾ ਸੀ, ਤੂੰ ਕਿਉਂ ਨਹੀਂ ਕੀਤਾ?
ਸਰ, ਸਮਝ ਨਹੀਂ ਆਇਆ।
ਕਿਉਂ ਸਮਝ ’ਚ ਨਹੀਂ ਆਇਆ?ਉਸ ਨੇ ਆਵਾਜ਼ ਨੂੰ ਸਖਤ ਕਰਕੇ ਪੁੱਛਿਆ।
ਸਰ, ਕੁਝ ਵੀ ਸਮਝ ’ਚ ਨਹੀਂ ਆਇਆ।ਬੱਚੇ ਦੀ ਆਵਾਜ਼ ਕੰਬੀ।
ਮਾਂ-ਪਿਓ ਨੂੰ ਕਹਿ ਥੋੜੇ ਬਦਾਮ ਖੁਆਉਣ। ਮੈਂ ਘੰਟਾ ਭਰ ਭੌਂਕਦਾ ਰਿਹਾ ਤੇ ਤੈਨੂੰ ਕੁਝ ਸਮਝ ਹੀ ਨਹੀਂ ਆਇਆ।
ਸਾਰੇ ਮੁੰਡੇ ਸ਼ਰਮਿੰਦਾ ਤੇ ਬੇਇੱਜ਼ਤ ਹੋਏ ਮੂੰਹ ਲਮਕਾਈ ਖੜੇ ਸਨ। ਅਧਿਆਪਕ ਜੇਤੂ ਦੀ ਤਰ੍ਹਾਂ ਛਾਤੀ ਤਾਣ ਕੇ ਖੜਾ ਸੀ। ਸਜ਼ਾ ਹੋਈਚਾਲੀ ਬੈਠਕਾਂ ਤੇ ਚਾਰ-ਚਾਰ ਡੰਡੇ
ਇਕ ਮੁੰਡਾ ਸੋਚਦਾ ਹੈ ਜਿੱਥੇ ਇੰਨੀ ਦੁਰਗਤੀ ਹੋਵੇ, ਉੱਥੇ ਭਵਿਖ ਕੀ ਬਣਨਾ ਹੈ।
ਦੂਜਾ ਸੋਚਦਾ ਹੈ ਇਸ ਨਰਕ ’ਚੋਂ ਤਾਂ ਭੱਜ ਈ ਜਾਈਏ ਤਾਂ ਚੰਗਾ ਐ।
ਦੰਦ ਪੀਸਦਾ ਹੋਇਆ ਤੀਜਾ ਮੁੰਡਾ ਸੋਚਦਾ ਹੈ ਇਸ ਮਾਸਟਰ ਨੇ ਬੜਾ ਦੁਖੀ ਕੀਤਾ ਹੋਇਐ। ਇਹਦੀ ਆਕੜ ਤਾਂ ਭੰਨਣੀ ਹੀ ਪਊਗੀ।
ਚੌਥਾ ਸੋਚ ਰਿਹਾ ਹੈ ਸਕੂਲ ਹੈ ਜਾਂ ਜੇਲ। ਮੌਕੇ ਦੀ ਤਲਾਸ਼ ਐ, ਕਦੋਂ ਇਹਦੀਆਂ ਖਿੜਕੀਆਂ, ਦਰਵਾਜੇ ਤੇ ਬੈਂਚ ਤੋੜਨ ਦਾ ਸੁਭਾਗ ਪ੍ਰਾਪਤ ਹੋਵੇ।
ਪੰਜਵਾਂ ਕੁਝ ਨਹੀਂ ਸੋਚਦਾ। ਉਹ ਖੁੰਡਾ ਹੁੰਦਾ ਜਾ ਰਿਹਾ ਹੈ। ਪੂਰੀ ਤਰ੍ਹਾਂ ਮੰਦਬੁੱਧੀ।
                                               -0-



ਇਲਜ਼ਾਮ
                                               
ਫੈਕਟਰੀ ਵਿੱਚ ਵਰਕਰਜ ਕਮੇਟੀ ਦੀਆਂ ਚੋਣਾਂ ਸਨ। ਚੋਣ ਪ੍ਰਚਾਰ ਜ਼ੋਰਾਂ ਤੇ ਸੀ।
ਭਰਾ ਰਾਮ ਖਿਲਾਵਨ! ਤੂੰ ਕਿੱਥੇ ਇੱਲੈ-ਪਿੱਲੈ ਦੇ ਚੱਕਰ ’ਚ ਪੈ ਗਿਆ। ਤੂੰ ਗੋਂਡਾ ਬਸਤੀ ਦਾ ਹੈਂ, ਸਾਡਾ ਭਾਈਬੰਦ। ਜੇਕਰ ਤੂੰ ਵੀ ਇੱਲੈ-ਪਿੱਲੈ ਦੇ ਚੱਕਰ ’ਚ ਆ ਗਿਆ ਤਾਂ ਸਮਝੋ ਬਹਿ ਗਿਆ ਭੱਠਾ।
ਕਿਉਂ ਕੀ ਹੋਇਆ?ਰਾਮ ਖਿਲਾਵਨ ਨੇ ਹੈਰਾਨੀ ਨਾਲ ਪੁੱਛਿਆ।
ਓਏ ਹੋਣਾ ਕੀ ਐ। ਜੇਕਰ ਅਸੀਂ ਇੱਕ-ਦੂਜੇ ਨੂੰ ਸਪੋਰਟ ਨਹੀਂ ਕਰਾਂਗੇ ਤਾਂ ਉਹ ਸਾਡੀ ਜ਼ਮੀਨ ਯਾਨੀ ਸਾਡੇ ਤੇ ਕਾਬਜ਼ ਹੋ ਜਾਣਗੇ। ਜ਼ਰਾ ਸੋਚ ਕੇ ਦੇਖ।
ਰਾਮ ਖਿਲਾਵਨ ਸੋਚੀਂ ਪੈ ਗਿਆ।
ਸਾਨੂੰ ਮਦਰਾਸ-ਕੇਰਲਾ ਵਾਲੇ ਨੌਕਰੀ ਨਹੀਂ ਦੇਣਗੇ। ਹਿੰਦੀ ਦਾ ਵਿਰੋਧ ਕਰਨਗੇ ਤੇ ਰੋਟੀ ਸਾਡੀ ਖਾਣਗੇ।
ਰੋਟੀ ਤਾਂ ਸਭ ਆਪਣੀ ਮਿਹਨਤ ਦੀ ਖਾਂਦੇ ਨੇ।ਰਾਮ ਖਿਲਾਵਨ ਮਨ ਹੀ ਮਨ ਸੋਚਦਾ ਹੈ। ਪਰ ਸਾਹਮਣੇ ਕਹਿੰਦਾ ਹੈ, ਗੱਲ ਤਾਂ ਠੀਕ ਐ, ਪਰ ਤੁਸੀਂ ਤਾਂ ਅਖੰਡ-ਭਾਰਤ ਤੇ ਭਾਰਤੀਅਤਾ ਦੀ ਗੱਲ ਕਰਦੇ ਹੋ।
ਉਹ ਸਭ ਛੱਡ। ਵੇਖ ਉਹ ਮਦਰਾਸੀ ਕਿਸੇ ਹਾਲਤ ’ਚ ਜਿੱਤਣਾ ਨਹੀਂ ਚਾਹੀਦਾ। ਆਪਣੀ ਪੂਰੀ ਤਾਕਤ ਸਾਡੇ ਵੱਲ ਲਾ ਦੇ। ਤੁਹਾਡੇ ਚੋਣ ਖੇਤਰ ਤੋਂ ਉਹ ਨਹੀਂ ਜਿੱਤਣਾ ਚਾਹੀਦਾ। ਚੰਗਾ ਤਾਂ ਚੱਲਾਂ।
ਉਹ ਕੁਝ ਕਦਮ ਦੂਰ ਹੀ ਗਏ ਸਨ ਕਿ ਰਾਮ ਖਿਲਾਵਨ ਨੂੰ ਕੁਝ ਯਾਦ  ਗਿਆ।
ਭਰਾ ਜੀ ਇੱਕ ਗੱਲ ਦੱਸੋ। ਜੇਕਰ ਤੁਸੀਂ ਮਦਰਾਸੀਆਂ ਦੇ ਵਿਰੁੱਧ ਹੋ ਤਾਂ ਫੇਰ ਵਰਕਸ਼ਾਪ ਤੋਂ ਪਿੱਲੈ ਨੂੰ ਕਿਉਂ ਖੜਾ ਕੀਤੈ?
ਤੂੰ ਨਹੀਂ ਸਮਝੇਂਗਾ, ਇਹ ਤਾਂ ਰਾਜਨੀਤੀ ਐਉੱਥੇ ਮਦਰਾਸੀਆਂ ਦੇ ਵੋਟ ਜ਼ਿਆਦਾ ਹਨ। ਫਿਰ ਇੱਕ-ਅੱਧ ਸੀਟ ਨਹੀਂ ਦਿਆਂਗੇ ਤਾਂ ਸਾਡੇ ਤੇ ਖੇਤਰਵਾਦ ਦਾ ਇਲਜ਼ਾਮ ਲੱਗੇਗਾ। ਪਰ ਤੈਨੂੰ ਇਨ੍ਹਾਂ ਗੱਲਾਂ ਨਾਲ ਕੀ ਮਤਲਬ। ਤੂੰ ਤਾਂ ਉਂਜ ਈ ਰਾਜਨੀਤੀ ਤੋਂ ਦੂਰ ਰਹਿਨੈਂ। ਚੰਗਾ ਹੈ, ਇਸ ਗੰਦਗੀ ’ਚ ਹੱਥ ਨਾ ਹੀ ਪਾ। ਚੰਗਾ ਖਿਆਲ ਰੱਖੀਂ, ਆਪਣੀ ਜਿੱਤ ਪੱਕੀ ਹੋਣੀ ਚਾਹੀਦੀ ਐ।
ਰਾਮ ਖਿਲਾਵਨ ਸੋਚ ਰਿਹਾ ਸੀ ਕਿ ਉਸ ਨੂੰ ਰਾਜਨੀਤੀ ਤੋਂ ਦੂਰ ਰਹਿਣਾ ਚਾਹੀਦਾ ਹੈ ਕਿ ਨਹੀਂ।
                                                  -0-


ਓਵਰਟਾਈਮ
                                              
ਫੈਕਟਰੀ ਵਿੱਚ ਸ਼ਟ ਡਾਊਨ ਚੱਲ ਰਿਹਾ ਸੀ। ਓਵਰਟਾਈਮ ਜ਼ੋਰਾਂ ਤੇ ਸੀ। ਸੋਲ੍ਹਾਂ ਘੰਟਿਆਂ ਤੋਂ ਘੱਟ ਦਾ ਤਾਂ ਸਵਾਲ ਹੀ ਨਹੀਂ ਸੀ। ਮਹੀਨੇ ਵਿੱਚ ਚਾਰ ਆਠੇ ਮਾਰ ਲੈਣਾ ਤਾਂ ਮਾਮੂਲੀ ਗੱਲ ਸੀ।
ਯਾਰ ਟੰਡਨ! ਓਵਰਟਾਈਮ ਨਾ ਹੋਵੇ ਤਾਂ ਹੱਥ ਤੰਗ ਜਿਹਾ ਹੀ ਰਹਿੰਦਾ ਹੈ।ਬੱਸ ਦੀ ਲਾਈਨ ਵਿੱਚ ਖੜੇ ਇੱਕ ਮਕੈਨਿਕ ਨੇ ਦੂਜੇ ਨੂੰ ਕਿਹਾ।
ਚੱਲ-ਚੱਲ, ਬੱਸ ਆ ਗਈ।ਦੂਜੇ ਨੇ ਪਹਿਲੇ ਦੀ ਗੱਲ ਅਣਸੁਣੀ ਕਰਦਿਆਂ ਕਿਹਾ।
ਉਹ ਦੋਹੇਂ ਚੂਹਿਆਂ ਦੀ ਤਰ੍ਹਾਂ ਭੀੜ ਵਿੱਚੋਂ ਨਿਕਲਕੇ ਬੱਸ ਵਿੱਚ ਸਵਾਰ ਹੋ ਗਏ। ਟਿਕਟ ਲੈਂਦੇ-ਲੈਂਦੇ ਸਿਵਲ ਹਸਪਤਾਲ ਦਾ ਸਟਾਪ  ਗਿਆ। ਐਨੇ ਵਿੱਚ ਵਰਮਾ ਬੱਸ ਵਿੱਚ ਚੜ੍ਹਿਆ।
ਖੈਰੀਅਤ ਤਾਂ ਹੈ! ਸਵੇਰ-ਸਵੇਰੇ ਇੱਥੇ ਕਿਵੇਂ?ਪਹਿਲੇ ਮਕੈਨਿਕ ਨੇ ਪੁੱਛਿਆ।
ਉਹ ਤੋਮਰ ਹੈ ਨਾ ਵਰਕਸ਼ਾਪ ’ਚ…
ਹਾਂ-ਹਾਂ!ਪਹਿਲੇ ਨੇ ਜਗਿਆਸਾ ਪ੍ਰਗਟਾਈ।
ਉਹਦੇ ਪਿਤਾ ਜੀ ਦੀ ਡੈੱਥ ਹੋ ਗਈਕੁਝ ਦਿਨਾਂ ਤੋਂ ਬੀਮਾਰ ਸਨ। ਸਾ'ਬ ਨੂੰ ਕਹਿ ਦੇਣਾ, ਮੈਂ ਅੱਜ ਨਹੀਂ ਆ ਸਕਾਂਗਾ।
ਓਹ! ਉਹਦੇ ਮੂੰਹ ਵਿੱਚੋਂ ਅਚਾਨਕ ਹੀ ਦੁੱਖਭਰੀ ਆਹ ਨਿਕਲੀ। ਫਿਰ ਉਹ ਰਾਹ ਵਿੱਚ ਖੜੀ ਭੀੜ ਦੇ ਰੇਲੇ ਨਾਲ ਅੱਗੇ ਵਧਕੇ ਸੀਟ ਉੱਤੇ ਬੈਠ ਗਏ।
ਯਾਰ ਬਵੇਜਾ! ਪੂਰਾ ਹਫਤਾ ਖਰਾਬ ਹੋਜੂਗਾ। ਦੋ ਸੌ ਰੁਪੇ ਦਾ ਨੁਕਸਾਨ ਹੋ ਜੂ।ਦੂਜੇ ਮਕੈਨਿਕ ਨੇ ਕਿਹਾ।
ਨਾਲੇ ਕੀ ਜ਼ਰੂਰੀ ਐ ਦਾਹ-ਸੰਸਕਾਰ ’ਚ ਜਾਣਾ। ਰਾਤ ਨੂੰ ਆਪਾਂ ਦੋਨੋਂ ਉਹਦੇ ਘਰ ਬੈਠ ਆਵਾਂਗੇ। ਕਹਿ ਦਿਆਂਗੇ, ਜ਼ਰੂਰੀ ਕੰਮ ਸੀ। ਸਾ'ਬ ਨੇ ਛੁੱਟੀ ਨਹੀਂ ਦਿੱਤੀ
ਵਰਮਾ ਸੁਣ ਰਿਹਾ ਸੀ। ਉਹਦੀਆਂ ਨਾੜਾਂ ਕਸੀਆਂ ਗਈਆਂ। ਕੰਨ ਲਾਲ ਹੋ ਗਏ। ਉਹ ਬੁੜਬੁੜਾਇਆ, ਸਾਲੇ ਹਰਾਮਜਾਦੇ!
                               -0-


ਆਦਮੀ ਦੀ ਮੌਤ

ਆਦਮੀ ਪਿਆ ਹੈ, ਸਡ਼ਕ ਤੋਂ ਥੋੜਾ ਜਿਹਾ ਹਟਕੇ, ਇੱਕ ਜੰਗਲੀ ਦਰੱਖਤ ਹੇਠ। ਬਿਲਕੁਲ ਖਾਲਸ ਜ਼ਮੀਨ ਉੱਤੇ।
ਇਹ ਆਦਮੀ ਬਸਤੀ ਵਿੱਚ ਨਵਾਂ ਹੈ। ਸ਼ਰੀਰਕ ਬਣਤਰ ਤੋਂ ਆਦੀਵਾਸੀ ਭੀਲ ਲਗਦਾ ਹੈ। ਬੀਮਾਰ ਤੇ ਬੇਸਹਾਰਾ। ਪਤਾ ਨਹੀਂ ਕਿੱਥੋਂ ਆਇਆ ਹੈ? ਇਸ ਕੜਾਕੇ ਦੀ ਠੰਡ ਵਿੱਚ ਉਸਦਾ ਜ਼ਿੰਦਾ ਰਹਿਣਾ ਅਸੰਭਵ ਹੈ। ਮੇਰਾ ਸੰਵੇਦਨਸ਼ੀਲ ਮਨ ਬੇਚੈਨ ਹੋ ਉੱਠਦਾ ਹੈ।
ਨੇੜੇ ਦੀ ਛਬੀਲ ਬੰਦ ਹੈ, ਪਰ ਨਲਕਾ ਚਾਲੂ ਹੈ। ਆਸਪਾਸ ਘਾਹ ਉੱਗ ਆਇਆ ਹੈ। ਉਪਜਾਊ ਜ਼ਮੀਨ ਦੇ ਵਿਸ਼ਾਲ ਧਰਾਤਲ ਉੱਪਰ ਘਾਹ ਦਾ ਇੱਕ ਟਾਪੂ।
ਪਰ ਇਸ ਆਦਮੀ ਦੇ ਸਬੰਧ ਵਿੱਚ ਘਾਹ ਦਾ ਟਾਪੂ ਖੋਜਣ ਕਿੱਥੇ ਜਾਵਾਂ। ਮਦਰ ਟੈਰੇਸਾ ਦਾ ਧਿਆਨ ਆਇਆ ਕਿ ਕਾਸ਼ ਉਹ ਇੱਥੇ ਹੁੰਦੀ, ਤਾਂ ਮੈਂ ਧਰਮ ਸੰਕਟ ਤੋਂ ਬਚ ਜਾਂਦਾ।
ਸੈਂਕੜੇ ਲੋਕ  ਆ ਜਾ ਰਹੇ ਹਨ। ਕੋਲ ਹੀ ਮੰਦਰ ਵਿੱਚ ਅਖੰਡ ਰਮਾਇਣ ਦਾ ਪਾਠ ਚੱਲ ਰਿਹਾ ਹੈ। ਦਸਹਿਰਾ ਮਣਾਇਆ ਜਾ ਰਿਹਾ ਹੈ। ਸਾਰਾ ਕੁਝ ਇੰਜ ਚੱਲ ਰਿਹਾ ਹੈ ਜਿਵੇਂ ਕੁਝ ਹੋਇਆ ਹੀ ਨਹੀਂ ਹੈ ਕਿਤੇ ਕੋਈ ਬੇਚੈਨੀ ਨਹੀਂ।
ਰਾਤ ਹੋਣ ਤਕ ਕੰਬਲ, ਭੋਜਨ, ਦਵਾਈ ਪਹੁੰਚ ਗਏ ਸਨ। ਯਾਨੀ ਉਹ ਸਭ ਮੇਰੇ ਤੋਂ ਕਿਤੇ ਵੱਧ ਬੇਚੈਨ ਸਨ। ਉਹ ਆਪਣੀ ਆਤਮਾ ਉੱਪਰ ਪਏ ਬੋਝ ਨੂੰ ਉਤਾਰ ਦੇਣਾ ਚਾਹੁੰਦੇ ਸਨ।
ਆਦਮੀ ਦਾ ਢੋਲ ਵਰਗਾ ਪੇਟ, ਉਲਝੇ ਖੜੇ ਵਾਲ, ਦਾੜ੍ਹੀ, ਸੁੱਕਾ ਜੰਗਲੀ ਘਾਹ, ਕਾਲਾ ਸਿਆਹ ਸਰੀਰ, ਬਾਹਰ ਨੂੰ  ਝਾਕਦੇ ਪੀਲੇ-ਮੈਲੇ ਦੰਦ ਤੇ ਸੁੰਨੀਆਂ ਅੱਖਾਂ, ਅਸਮਾਨ ਵੱਲ ਤਕਦੀਆਂ ਹੋਈਆਂ। ਉਮਰ ਇਹੀ ਕੋਈ ਚੌਂਤੀ-ਪੈਂਤੀ ਵਰ੍ਹੇ। ਉਂਜ ਆਦਮੀ ਦੀ ਉਮਰ ਹਜ਼ਾਰਾਂ ਸਾਲ ਦੀ ਹੈ, ਪਰ ਕੋਈ ਜ਼ਰੂਰੀ ਨਹੀਂ ਕਿ ਉਮਰ ਵਧਣ ਨਾਲ, ਸਭਿਆਚਾਰ ਦੇ ਵਿਕਾਸ ਨਾਲ ਮਨੁੱਖਤਾ ਵਿੱਚ ਵੀ ਵਾਧਾ ਹੋਵੇਹਰ ਸਭਿਅਤਾ ਵਿੱਚ ਹਾਸ਼ੀਏ ਉੱਤੇ ਪਏ ਲੋਕਾਂ ਦੀ ਇਹੀ ਹੋਣੀ ਰਹੀ ਹੈ।
ਲੋਕ ਬੇਚੈਨ ਹਨ, ਕਿਉਂਕਿ ਇਹ ਇੱਕ ਸੰਭਾਵਨਾ ਹੈ, ਆਦਮੀ ਦੀ ਹੋਣੀ ਇਹ ਵੀ ਹੋ ਸਕਦੀ ਹੈ, ਮੇਰੀ ਵੀ। ਮੈਂ ਕੰਬ ਉੱਠਦਾ ਹਾਂ।
ਲੋਕ ਔਖ ਮਹਿਸੂਸ ਕਰ ਰਹੇ ਹਨ। ਕਈਆਂ ਨੇ ਰਾਹ ਬਦਲ ਲਿਆ ਹੈ। ਲੋਕ ਆਪਸ ਵਿੱਚ ਗੱਲਾਂ ਕਰ ਰਹੇ ਹਨ, ਕਿੱਥੋਂ ਆ ਗਿਆ? ਕੀ ਇਹਨੇ ਇੱਥੇ ਈ ਮਰਨੈ।
ਤੇ ਇੱਕ ਰਾਤ ਉਹ ਮਰ ਗਿਆ। ਰਾਤ ਦੀ ਖਾਮੋਸ਼ੀ ਵਿੱਚ ਬੱਸ ਝੀਂਗਰ ਰੋਂਦੇ ਰਹੇ। ਅਸਮਾਨ ਵੀ ਚੁੱਪਚਾਪ ਰੋਂਦਾ ਰਿਹਾ, ਹੰਝੂ ਵਹਾਉਂਦਾ ਰਿਹਾ, ਆਦਮੀ ਦੀ ਮੌਤ ਉੱਤੇ।
                        -0-



Tuesday, December 14, 2010

ਸੂਰਯਕਾਂਤ ਨਾਗਰ


ਸੂਰਯਕਾਂਤ ਨਾਗਰ ਹਿੰਦੀ ਮਿੰਨੀ ਕਹਾਣੀ ਦੇ ਮਹੱਤਵਪੂਰਣ ਹਸਤਾਖਰ ਹਨ। ਲਗਭਗ 78 ਸਾਲ ਦੀ ਉਮਰ ਵਿਚ ਵੀ ਉਹ ਲੇਖਣ ਦੇ ਕਾਰਜ ਵਿਚ ਪੂਰੀ ਤਰ੍ਹਾਂ ਸਰਗਰਮ ਹਨ। ਸਾਹਿਤਕ ਸਮਾਗਮਾਂ ਵਿਚ ਭਾਗ ਲੈਣ ਲਈ ਲੰਮੀ ਦੂਰੀ ਤੈਅ ਕਰ ਲੈਂਦੇ ਹਨ। ਲੇਖਕ ਦੇ ਪਰੀਚੈ ਨਾਲ ਕੁਝ ਰਚਨਾਵਾਂ ਪ੍ਰਸਤੁਤ ਹਨਅਗਰਵਾਲ

*******

ਜਨਮ : 3 ਫਰਵਰੀ, 1933 (ਸ਼ਾਜਾਪੁਰ-ਮੱਧ ਪ੍ਰਦੇਸ਼)

ਸਿੱਖਿਆ : ਵਿਗਿਆਨ ਵਿਚ ਪੋਸਟ-ਗ੍ਰੈਜੁਏਟ ਤੇ ਐਲ.ਐਲ.ਬੀ.

ਪ੍ਰਮੁਖ ਵਿਧਾਵਾਂ : ਕਹਾਣੀ, ਲਘੁਕਥਾ

ਮੌਲਿਕ ਪੁਸਤਕਾਂ : ਵਿਸ਼-ਬੀਜ(ਲਘੁਕਥਾ ਸੰਗ੍ਰਹਿ), ਸੱਤ ਕਹਾਣੀ ਸੰਗ੍ਰਹਿ, ਦੋ ਨਾਵਲ ਤੇ ਤਿੰਨ ਹੋਰ ਪੁਸਤਕਾਂ

ਸੰਪਾਦਨ :‘ਪ੍ਰਤਿਨਿਧ ਲਘੁਕਥਾਏਂ’, ‘ਤੀਸਰੀ ਆਂਖ( ਲਘੁਕਥਾ ਸੰਗ੍ਰਹਿ), ਅਤੀਤ ਸੇ ਅਲਗ(ਕਹਾਣੀ ਸੰਗ੍ਰਹਿ)

ਸਨਮਾਨ/ਪੁਰਸਕਾਰ:ਮੱਧ ਪ੍ਰਦੇਸ਼ ਸਾਹਿਤਯ ਪਰਿਸ਼ਦ ਵੱਲੋਂ ‘ਸੁਭੱਦ੍ਰਾਕੁਮਾਰੀ ਚੌਹਾਨ ਸਨਮਾਨ’। ਦੁਸ਼ਯੰਤ ਕੁਮਾਰ

ਪਾਂਡੁਲਿਪਿ ਸਮ੍ਰਿਤੀ ਸੰਗ੍ਰਹਾਲਯ ਵੱਲੋਂ ‘ਦੁਸ਼ਯੰਤ ਕੁਮਾਰ ਅਲੰਕਰਣ’, ‘ਅੰਬਿਕਾ ਪ੍ਰਸਾਦ ਦਿਵਯ

ਪੁਰਸਕਾਰ, ਮ,ਪ੍ਰ. ਲੇਖਕ ਸੰਘ ਵੱਲੋਂ ‘ਪੁਸ਼ਕਰ ਸਨਮਾਨ’ ਸੰਪਰਕ : 81, ਬੈਰਾਠੀ ਕਾਲੋਨੀ ਨੰ: 2, ਇੰਦੌਰ (ਮੱਧ ਪ੍ਰਦੇਸ਼)-452014

ਫੋਨ:0731-2470668 ਮੋਬਾਈਲ: 09893810050

*****

ਫਲ

ਮਾਂ ਜੀ ਨੇ ਸਵੇਰ ਦਾ ਕੁਝ ਨਹੀਂ ਖਾਧਾ, ਇਨ੍ਹਾਂ ਨੂੰ ਵੀ ਕੁਝ ਦਿਓ।ਲੰਮੇਂ ਸਫਰ ਦੇ ਸਾਥੀ ਮੁਸਾਫਰ ਦੇ ਨਾਤੇ ਮੈਂ ਆਪਣੀ ਚਿੰਤਾ ਪ੍ਰਗਟਾਈ।

ਮਾਂ ਸਫਰ ’ਚ ਅੰਨ ਗ੍ਰਹਿਣ ਨਹੀਂ ਕਰਦੀ।ਉਹਨਾਂ ਨੇ ਦੱਸਿਆ।

ਕੁਝ ਫਲ-ਫੁਲ ਈ ਲੈ ਦਿਓ।ਮੈਂ ਸੁਝਾਇਆ।

ਪਤਾ ਨਹੀਂ ਪੁੱਤਰ ਨੇ ਢੰਗ ਨਾਲ ਸੁਣਿਆ ਜਾਂ ਨਹੀਂ, ਜਾਂ ਸੁਣਕੇ ਅਣਸੁਣਿਆ ਕਰ ਦਿੱਤਾ। ਅਗਲੇ ਸਟੇਸ਼ਨ ਉੱਤੇ ਗੱਡੀ ਰੁਕੀ ਤਾਂ ਮਾਂ ਦਾ ਨਿੱਕਾ ਪੋਤਰਾ ਅੰਗੂਰ ਵਾਲੇ ਨੂੰ ਦੇਖ ਕੇ ਅੰਗੂਰਾਂ ਲਈ ਮਚਲ ਉੱਠਿਆ। ਹਾਰ ਕੇ ਉਹਨਾਂ ਨੇ ਬੇਟੇ ਨੂੰ ਅੰਗੂਰ ਲੈ ਦਿੱਤੇ।

ਬੇਟੇ, ਕੁਝ ਅੰਗੂਰ ਦਾਦੀ ਜੀ ਨੂੰ ਵੀ ਦਿਓ।ਉਹਨਾਂ ਨੇ ਕਿਹਾ, ਪਰ ਲਾਡਲਾ ਇਸ ਲਈ ਤਿਆਰ ਨਹੀਂ ਹੋਇਆ। ਮੰਮੀ-ਪਾਪਾ ਨੇ ਡਾਂਟਿਆ ਵੀ, ਪਰ ਉਸ ਡਾਂਟ ਵਿਚ ਲਾਡ-ਪਿਆਰ ਇਸ ਕਦਰ ਸ਼ਾਮਲ ਸੀ ਕਿ ਨਿੱਕੇ ਉੱਤੇ ਕੋਈ ਅਸਰ ਨਹੀਂ ਹੋਇਆ।

ਕੁਝ ਦੇਰ ਬਾਦ ‘ਦਸ ਦੇ ਤਿੰਨ, ਦਸ ਦੇ ਤਿੰਨ!’ ਕਰਦਾ ਸੰਤਰੇ ਵੇਚਣ ਵਾਲਾ ਆਇਆ ਤਾਂ ਮੇਰੇ ਕੋਲੋਂ ਰਿਹਾ ਨਾ ਗਿਆ, ਮਾਂ ਜੀ ਲਈ ਸੰਤਰੇ ਹੀ ਖਰੀਦ ਲਓ।

ਉਹਨਾਂ ਨੇ ਕੁਝ ਛਿਣ ਵਿਚਾਰ ਕੀਤਾ ਤੇ ਫਿਰ ਮਾਂ ਨੂੰ ਕਿਹਾ, ਮਾਂ, ਜਰਾ ਦਸ ਰੁਪਏ ਦੇਈਂ, ਮੇਰੇ ਕੋਲ ਖੁੱਲ੍ਹੇ ਨਹੀਂ ਹਨ।

ਮਾਂ ਨੇ ਕਿਹਾ, ਰਹਿਣ ਦੇ ਪੁੱਤ, ਅਜਿਹਾ ਵੀ ਕੀ ਜ਼ਰੂਰੀ ਐ।

ਬੇਟੇ ਨੇ ਜਿੱਦ ਕੀਤੀ ਤਾਂ ਮਾਂ ਨੇ ਗੰਢ ਵਿੱਚੋਂ ਦਸ ਦਾ ਨੋਟ ਕੱਢ ਕੇ ਪੁੱਤਰ ਦੇ ਹੱਥ ਉੱਤੇ ਰੱਖ ਦਿੱਤਾ। ਇਸ ਵਾਰ ਵੀ ਨਿੱਕੇ ਨੇ ਸੰਤਰਿਆਂ ਦੀ ਥੈਲੀ ਝਪਟ ਲਈ ਤੇ ਬੋਲਿਆ, ਮੈਂ ਕਿਸੇ ਨੂੰ ਨੀ ਦੇਣੇ ਸੰਤਰੇ। ’ਕੱਲਾ ਖਾਊਂਗਾ।

ਉਹਦੇ ਪਾਪਾ ਨੇ ਜ਼ੋਰ ਜਬਰਦਸਤੀ ਕੀਤੀ ਤਾਂ ਨਿੱਕਾ ਜ਼ੋਰ ਜ਼ੋਰ ਨਾਲ ਰੋਣ ਲੱਗਾ। ਹੱਥ-ਪੈਰ ਮਾਰਨ ਲੱਗਾ। ਇਸ ਖਿੱਚ-ਧੂਹ ਵਿਚ ਉਹਨੇ ਪਾਪਾ ਦਾ ਮੂੰਹ ਵੀ ਨੋਚ ਲਿਆ। ਉਹਦੀ ਦਾਦੀ ਨੇ ਕਿਹਾ, ਰਹਿਣ ਦੇ ਪੁੱਤ! ਨਿੱਕਾ ਖਾ ਲੂਗਾ ਤਾਂ ਸਮਝੂੰਗੀ ਮੈਂ ਈ ਖਾਧਾ ਐ।

ਨਿੱਕੇ ਨੇ ਢਿੱਡ ਭਰ ਜਾਣ ਉੱਤੇ ਇਕ ਸੰਤਰਾ ਪਾਪਾ ਵੱਲ ਕਰਦਿਆਂ ਕਿਹਾ, ਪਾਪਾ, ਇਹ ਤੁਸੀਂ ਖਾ ਲੋ।

ਦਾਦੀ ਨੂੰ ਦੇ ਦੇ ਬੇਟੇ!ਪਾਪਾ ਨੇ ਸਮਝਾਉਣਾ ਚਾਹਿਆ, ਪਰ ਨਿੱਕਾ ਰਾਜੀ ਨਹੀਂ ਹੋਇਆ। ਮਾਂ ਵਿਚਾਰਗੀ ਨਾਲ ਇਹ ਸਭ ਦੇਖ ਰਹੀ ਸੀ। ਆਖਰ ਉਹਨੇ ਕਿਹਾ, ਅੱਜ ਦੇ ਰਿਹੈ ਤਾਂ ਲੈ ਲੈ ਪੁੱਤ, ਪਤਾ ਨਹੀਂ ਕੱਲ ਕਿਹਾ ਫਲ ਮਿਲੇ।

-0-

ਪ੍ਰਦੂਸ਼ਨ

ਮਗਰਮੱਛ ਦੇ ਮੂੰਹ ਵਾਂਗ ਪਾਟੇ ਪੁਰਾਣੇ ਬੂਟਾਂ ਨੂੰ ਸਡ਼ਕ ਕਿਨਾਰੇ ਬੈਠੇ ਮੋਚੀ ਤੋਂ ਸਿਲਵਾਉਣ ਲਈ ਮੈਂ ਮਜ਼ਬੂਰ ਹੋ ਗਿਆ। ਟੁੱਟੇ ਖਡ਼ਕਦੇ ਸਾਇਕਲ ਨੂੰ ਸਡ਼ਕ ਕਿਨਾਰੇ ਖਡ਼ਾ ਕਰ ਮੈਂ ਬੂਟ ਮੋਚੀ ਦੇ ਸਪੁਰਦ ਕਰ ਦਿੱਤੇ ਤੇ ਇਕ ਪਾਸੇ ਖਡ਼ਾ ਹੋ ਗਿਆ। ਉਹ ਸਡ਼ਕ ਕੁਡ਼ੀਆਂ ਦੇ ਹਾਈ ਸਕੂਲ ਨੂੰ ਜਾਂਦੀ ਸੀ। ਤੇਰ੍ਹਾਂ ਤੋਂ ਸੋਲ੍ਹਾਂ ਸਾਲ ਦੀ ਉਮਰ ਦੀਆਂ ਕੁਡ਼ੀਆਂ ਦੀਆਂ ਟੋਲੀਆਂ ਇਕ ਤੋਂ ਬਾਦ ਇਕ ਉੱਥੋਂ ਲੰਘ ਰਹੀਆਂ ਸਨ। ਫੈਸ਼ਨ ਪਰੇਡ ਵਾਂਗ ਲੰਘ ਰਹੀਆਂ ਟੋਲੀਆਂ ਵਿੱਚੋਂ ਕੁਡ਼ੀਆਂ ਦੇ ਕੁਝ ਵਾਕ ਕਦੇ ਕਦੇ ਮੇਰੇ ਕੰਨਾਂ ਤਕ ਪੁੱਜ ਰਹੇ ਸਨ।

ਮਹਾਂਚੋਰ ਦੇਖੀ?

ਹਾਂ, ਪਰ ਹੁਣ ਰਾਜੇਸ਼ ਖੰਨਾ ਚ ਉਹ ਗੱਲ ਨਹੀਂ।

ਕੁੱਝ ਚਿਰ ਚੁੱਪ। ਫਿਰ ਖਣਕਦੀ ਆਵਾਜ਼, ਕਾਗਜ਼ ਕੀ ਨਾਵ ਦੇਖੀ?

ਮੰਮੀ-ਡੈਡੀ ਲੈ ਕੇ ਈ ਨਹੀਂ ਗਏ। ਕਹਿੰਦੇ ਸਰਟੀਫਿਕੇਟ ਵਾਲੀ ਐ।

ਕਿਸੇ ਦਿਨ ਸਕੂਲੋਂ ਚੱਲੀਏ?

ਨਾ ਨੀਂ, ਐਮਰਜੈਂਸੀ ਚ ਸਿਨਮੇ ਵਾਲੇ ਬਡ਼ੇ ਸਟ੍ਰਿਕਟ ਐ। ਘੱਟ ਉਮਰ ਵਾਲਿਆਂ ਨੂੰ ਜਾਣ ਨਹੀਂ ਦਿੰਦੇ। ਪਹਿਲਾਂ ਚੱਲ ਜਾਂਦਾ ਸੀ।

ਸੁਣਿਐ ਚਿੰਟੂ ਤੇ ਨੀਤੂ ਦਾ ਅੱਜਕਲ ਚੱਕਰ ਚੱਲ ਰਿਹੈ।

ਨੀ ਇਹ ਤਾਂ ਜੋਡ਼ੀ ਬਨਾਉਣ ਦੇ ਫਿਲਮੀ ਨੁਸਖੇ ਨੇ।

ਨੀ, ਉਹ ਨਵਾਂ ਸ਼ਿੰਦੇ ਸਰ ਕਿੰਨਾ ਆਕਡ਼ਦਾ ਐ।

ਛੀਂਟ ਦੀ ਨਵੀਂ ਸ਼ਰਟ ਪਾ ਕੇ ਆਪਣੇ ਆਪ ਨੂੰ ਛੋਟੀ ਸੀ ਬਾਤ ਦਾ ਹੀਰੋ ਸਮਝਦੈ।

ਮੈਨੂੰ ਤਾਂ ਬਹੁਤ ਪਿਆਰਾ ਲੱਗਦੈ, ਬਿਲਕੁਲ ਅਮੋਲ ਪਾਲੇਕਰ ਵਰਗਾ।

ਮੈਂ ਕੁਡ਼ੀਆਂ ਦੀ ਇਸ ਆਖਰੀ ਟੋਲੀ ਨੂੰ ਦੇਖਦਾ ਹੀ ਰਹਿ ਜਾਂਦਾ ਹਾਂ। ਮੋਚੀ ਨੇ ਸਿਉਂ ਕੇ ਬੂਟ ਮੇਰੇ ਸਾਹਮਣੇ ਰੱਖ ਦਿੱਤੇ। ਫਿਰ ਵੀ ਮੇਰੀ ਬਿਰਤੀ ਭੰਗ ਨਹੀਂ ਹੋਈ। ਆਖਰ ਉਹ ਬੋਲਿਆ, ਕੀ ਕੁਡ਼ੀਆਂ ਚ ਖੁੱਭ ਗਏ ਬਾਬੂ ਜੀ?

ਉਹਨੂੰ ਕੀ ਜਵਾਬ ਦਿੰਦਾ! ਕੀ ਇਹ ਕਹਿੰਦਾ ਕਿ ਕੁਡ਼ੀਆਂ ਦੀ ਉਸ ਆਖਰੀ ਟੋਲੀ ਦਾ ਉਹ ਆਖਰੀ ਵਾਕ ਮੇਰੀ ਧੀ ਦਾ ਸੀ।

-0-

ਨਜ਼ਰੀਆ

ਫਿਲਮ ਸ਼ੁਰੂ ਹੋਣ ਤੋਂ ਪਹਿਲਾਂ ਪੰਜ ਸਾਲਾ ਬੱਚਾ ਖਚਾਖਚ ਭਰੇ ਸਿਨਮਾ ਹਾਲ ਦੀ ਬਾਲਕਨੀ ਦੀ ਰੇਲਿੰਗ ਉੱਤੇ ਝੁਕ ਕੇ ਹੇਠਾਂ ਦੇਖ ਰਿਹਾ ਸੀ।

ਇਸ ਤਰ੍ਹਾਂ ਨਾ ਝੁਕ ਬੇਟੇ, ਥੱਲੇ ਡਿੱਗ ਪਏਂਗਾ। ਪਿਤਾ ਨੇ ਪੁੱਤਰ ਨੂੰ ਸਮਝਾਇਆ। ਪਰ ਮੁੰਡਾ ਨਹੀਂ ਮੰਨਿਆਂ। ਹੇਠਾਂ ਹਾਲ ਵਿਚ ਬੈਠੇ ਦਰਸ਼ਕਾਂ ਵੱਲ ਹੋਰ ਝੁਕ ਕੇ ਦੇਖਣ ਲੱਗਾ।

ਤੈਨੂੰ ਮਨ੍ਹਾ ਕੀਤਾ ਐ ਨਾ…ਹੇਠਾਂ ਡਿੱਗ ਗਿਆ ਤਾਂ ਸੱਟ ਵੱਜ ਜੂਗੀ।ਪਿਤਾ ਨੇ ਥੋੜਾ ਭੜਕ ਕੇ ਕਿਹਾ।

ਹੇਠਾਂ ਬੈਠੇ ਲੋਕਾਂ ਤੇ ਡਿੱਗੂੰਗਾ ਤਾਂ ਉਨ੍ਹਾਂ ਦੇ ਵੀ ਸੱਟ ਲੱਗੂਗੀ ਨਾ ਪਾਪਾ?

ਕਹਿ ਰਿਹਾ ਹਾਂ ਕਿ ਡਿੱਗ ਪਿਆ ਤਾਂ ਤੈਨੂੰ ਸੱਟ ਵੱਜ ਜੂਗੀ, ਲਹੂਲੁਹਾਨ ਹੋਜੇਂਗਾ।

ਨਹੀਂ ਪਾਪਾ, ਪਹਿਲਾਂ ਇਹ ਦੱਸੋ ਕਿ ਜੇਕਰ ਮੈਂ ਜ਼ੋਰ ਨਾਲ ਉਨ੍ਹਾਂ ਲੋਕਾਂ ’ਤੇ ਡੱਗਿਆ ਤਾਂ ਉਨ੍ਹਾਂ ਨੂੰ ਸੱਟ ਵੱਜੂਗੀ ਜਾਂ ਨਹੀਂ?

ਫਿਰ ਉਹੀ ਗੱਲ! ਪਿਤਾ ਖਿਝ ਜਿਹਾ ਗਿਆ।

ਪਾਪਾ, ਦੱਸੋ ਨਾ ਕਿ ਮੇਰੇ ਡਿੱਗਣ ਨਾਲ ਹੇਠਾਂ ਬੈਠੇ ਲੋਕ ਵੀ ਜ਼ਖਮੀ ਹੋ ਸਕਦੇ ਹਨ ਜਾਂ ਨਹੀਂ?ਬੱਚੇ ਨੇ ਜਿੱਦ ਕੀਤੀ।

ਪਿਤਾ ਨੇ ਗੁੱਸੇ ਵਿਚ ਆ ਕੇ ਬੱਚੇ ਦੇ ਚਪੇੜ ਮਾਰੀ ਤੇ ਉਸਨੂੰ ਆਪਣੇ ਵੱਲ ਖਿੱਚਦੇ ਹੋਏ ਕਿਹਾ, ਸਾਲਾ ਦੂਜਿਆਂ ਦੀ ਚਿੰਤਾ ਕਰਦੈ!

-0-

ਅਪਮਾਨ

ਮੈਂ ਦੇਖ ਰਹੀ ਆਂ ਰੀਟਾ, ਸਵੇਰ ਦੀ ਤੂੰ ਕੁਝ ਉਖਡ਼ੀ ਉਖਡ਼ੀ ਐਂ। ਗੱਲ ਗੱਲ ਤੇ ਵੱਢਣ ਨੂੰ ਆਉਨੀ ਐਂ। ਆਖਰ ਇਹ ਖਿੱਝ ਤੇ ਗੁੱਸਾ ਕਿਉਂ?

ਮੰਮੀ! ਉਹ ਵਿੱਕੀ ਦੀ ਚਿੱਠੀ ਆਈ ਐ।

ਕਿਹਡ਼ਾ ਵਿੱਕੀ?

ਉਹੀ ਖੰਨਾ ਅੰਕਲ ਦਾ ਭਾਣਜਾ, ਜਿਹਡ਼ਾ ਪਡ਼੍ਹਨ ਲਈ ਇੱਥੇ ਆਇਆ ਸੀ ਤੇ ਪਡ਼੍ਹਾਈ ਵਿੱਚੇ ਈ ਛੱਡ ਕੇ ਚਲਾ ਗਿਆ ਸੀ। ਉਹੀ ਜਿਹਡ਼ਾ ਕਦੇ ਕਦਾਈਂ ਸਾਡੇ ਘਰ ਵੀ ਆਉਂਦਾ ਹੁੰਦਾ ਸੀ। ਕਦੇ ਤੁਹਾਡੇ ਨਾਲ ਤੇ ਕਦੇ ਮੇਰੇ ਨਾਲ ਹਾਸਾ-ਮਜ਼ਾਕ ਕਰਦਾ ਰਹਿੰਦਾ ਸੀ। ਸਿਨੇਮੇ ਜਾਣ ਨੂੰ ਵੀ ਕਹਿੰਦਾ ਹੁੰਦਾ ਸੀ।

ਫੇਰ?

ਫੇਰ ਕੀ! ਉਹਨੇ ਲਿਖਿਐ ਪਿਆਰੀ ਭੈਣ ਰੀਟਾ!

ਪਰ ਇਸ ’ਚ ਇੰਨਾ…?ਮਾਂ ਨੇ ਅਧੂਰੇ ਪ੍ਰਸ਼ਨ ਨਾਲ ਪੂਰੀ ਗੱਲ ਕਹਿਣ ਦੀ ਕੋਸ਼ਿਸ਼ ਕੀਤੀ।

ਮੰਮੀ! ਮੈਨੂੰ ਇੰਜ ਸੰਬੋਧਨ ਕਰਨ ਦਾ ਉਹਨੂੰ ਕੀ ਅਧਿਕਾਰ ਐ? ਏਥੇ ਸੀ ਉਦੋਂ ਤਾਂ ਉਹਨੇ ਕਦੇ ਅਜਿਹਾ ਕੁਝ ਨਹੀਂ ਕੀਤਾ। ਇਹ ਮੇਰਾ ਅਪਮਾਨ ਕਰਨ ਬਰਾਬਰ ਐ। ਮੈਂ ਇਹ ਬਰਦਾਸ਼ਤ ਨਹੀਂ ਕਰ ਸਕਦੀ।

ਮਾਂ ਕੀ ਜਵਾਬ ਦਿੰਦੀ, ਬਸ ਆਪਣੀ ਧੀ ਨੂੰ ਦੇਖਦੀ ਰਹੀ।

-0-

Saturday, July 17, 2010

ਪਵਨ ਸ਼ਰਮਾ







ਪਵਨ ਸ਼ਰਮਾ ਪਿਛਲੀ ਸਦੀ ਦੇ ਨੌਵੇਂ ਦਹਾਕੇ ਦੀ ਸ਼ੁਰੂਆਤ ਤੋਂ ਹੀ ਹਿੰਦੀ ਲਘੁਕਥਾ ਸਾਹਿਤ ਵਿਚ ਚਰਚਿਤ ਰਹੇ ਹਨ। ਚੁੱਪਚਾਪ ਆਪਣਾ ਕੰਮ ਕਰਨ ਵਿਚ ਵਿਸ਼ਵਾਸ ਰੱਖਣ ਵਾਲੇ ਇਸ ਲੇਖਕ ਦਾ ਪਰੀਚੈ ਤੇ ਉਸਦੀਆਂ ਕੁਝ ਰਚਨਾਵਾਂ ਪੇਸ਼ ਕਰ ਰਿਹਾ ਹਾਂ–ਅਗਰਵਾਲ।
                           *********

ਜਨਮ : 30 ਜੂਨ, 1961
ਸਿੱਖਿਆ : ਐਮ.ਏ. (ਹਿੰਦੀ), ਬੀ.ਐਸ-ਸੀ., ਬੀ.ਐਡ ।
ਪ੍ਰਕਾਸ਼ਿਤ ਪੁਸਤਕਾਂ : ‘ਅਪਣੇ-ਅਪਣੇ ਦਾਇਰੇ’, ‘ਜੰਗ ਲਗੀਂ ਕੀਲੇਂ’ ਤੇ ‘ਹਮ ਜਹਾਂ ਹੈਂ’ (ਲਘੁਕਥਾ ਸੰਗ੍ਰਹਿ),
‘ਯੇ ਸ਼ਹਿਰ ਹੈ’ (ਕਹਾਣੀ ਸੰਗ੍ਰਹਿ), “ਕਿਸੀ ਭੀ ਵਾਰਦਾਤ ਕੇ ਬਾਦ’ (ਕਾਵਿ ਸੰਗ੍ਰਹਿ)
ਸਨਮਾਨ : ‘ਮ.ਪ੍ਰ. ਆਂਚਲਿਕ ਸਾਹਿਤਯਕਾਰ ਪਰਿਸ਼ਦ, ਜਬਲਪੁਰ’ ਵੱਲੋਂ ‘ਸ਼੍ਰੀ ਦੇਵੇਂਦਰ ਆਦਰਸ਼
ਪੁਰਸਕਾਰ’ ਤੇ ‘ਭਾਰਤੀਯ ਸਾਹਿਤਯ ਸੰਗਮ, ਨਈ ਦਿੱਲੀ’ ਵੱਲੋਂ ‘ਸਵਿਤਾ ਪੁਰਸਕਾਰ’ ਨਾਲ
ਸਨਮਾਨਤ। ‘ਕਰਵਟ ਕਲਾ ਪਰਿਸ਼ਦ, ਭੋਪਾਲ’ ਵੱਲੋਂ ‘ਰਤਨ ਭਾਰਤੀ’ ਪੁਰਸਕਾਰ ਪ੍ਰਾਪਤ। ਕਿੱਤਾ : ਅਧਿਆਪਕ
ਸੰਪਰਕ : ਵਿੱਦਿਆ ਭਵਨ, ਸੁਕਰੀ ਚਰਚ, ਜੁੱਨਾਰਦੇਵ, ਜ਼ਿਲ੍ਹਾ-ਛਿੰਦਵਾਡ਼ਾ (ਮੱਧ ਪ੍ਰਦੇਸ਼)-480551
ਫੋਨ : 07160-230853 ਮੋਬਾਈਲ : 09425837079
                                                 *********

1.ਜ਼ਰੂਰਤ

            ਉਹ ਅੰਦਰ ਹੀ ਅੰਦਰ ਸੁਲਗ ਰਿਹਾ ਹੈ। ਕਰੇ ਵੀ ਤਾਂ ਕੀ ਕਰੇ…ਪਿਓ ਨੂੰ ਕੁਝ ਕਰ ਨਹੀਂ ਸਕਦਾ…ਕੁਝ ਕਹਿ ਵੀ ਨਹੀਂ ਸਕਦਾ…ਬਸ, ਸੁਲਗ ਰਿਹਾ ਹੈ…ਸੁਲਗਦਾ ਹੀ ਜਾ ਰਿਹਾ ਹੈ।
           “ਕੀ ਲੋਡ਼ ਐ ਨਿੱਕੀ ਨੂੰ ਨੌਕਰੀ ਕਰਾਉਣ ਦੀ?” ਉਹ ਆਪਣੀ ਛੋਟੀ ਭੈਣ ਨੂੰ ਨਿੱਕੀ ਹੀ ਕਹਿੰਦਾ ਹੈ, ਬਚਪਨ ਤੋਂ।
           “ਕਿਉਂ?”
           “ਤੁਸੀਂ ਤਾਂ ਹਰ ਗੱਲ ’ਚ ਕਿਉਂ ਲਾ ਦਿੰਦੇ ਹੋ, ਕੁਝ ਸਮਝਦੇ ਹੀ ਨਹੀਂ।”
           “ਜੇ ਉਹ ਨੌਕਰੀ ਕਰ ਰਹੀ ਐ ਤਾਂ ਕੀ ਬੁਰਾਈ ਐ? ਰਘੁ ਵੀ ਤਾਂ ਉਸੇ ਦੇ ਦਫਤਰ ’ਚ ਕੰਮ ਕਰ ਰਿਹੈ। ਦੇਖਭਾਲ ਵੀ ਕਰਦਾ ਹੋਵੇਗਾ ਆਪਣੀ ਭੈਣ ਦੀ।” ਉਹ ਐਨਕ ਪਿੱਛੋਂ ਝਾਕਦੇ ਹੋਏ ਬੋਲੇ।
           “ਬਾਹਰ ਵਾਲੇ ਬੋਲਦੇ ਹਨ। ਕਹਿੰਦੇ ਹਨ– ਧੀ ਦੀ ਕਮਾਈ ਖਾਂਦੇ ਹਨ। ਅਜਿਹੀਆਂ ਗੱਲਾਂ ਮੇਰੇ ਤੋਂ ਬਰਦਾਸ਼ਤ ਨਹੀਂ ਹੁੰਦੀਆਂ। ਤੇ ਫਿਰ ਮੈਂ ਕਮਾ ਰਿਹਾ ਹਾਂ, ਰਘੁ ਕਮਾ ਰਿਹਾ ਹੈ, ਫਿਰ ਨਿੱਕੀ ਨੂੰ ਨੌਕਰੀ ਕਰਨ ਦੀ ਕੀ ਲੋਡ਼ ਐ?” ਉਹ ਫਿਰ ਕਹਿੰਦਾ ਹੈ, ਸੁਲਗਦਾ ਹੋਇਆ।
           “ਤੂੰ ਅਜੇ ਬੱਚਾ ਐਂ।”
           “ਜੇਕਰ ਤੁਸੀਂ ਨਿੱਕੀ ਨੂੰ ਨੌਕਰੀ ਤੋਂ ਨਹੀਂ ਹਟਾਇਆ, ਤਾਂ ਮੈਂ ਉਸਨੂੰ ਹਟਵਾ ਦਿਆਂਗਾ…ਕਿਸੇ ਵੀ ਤਰ੍ਹਾਂ।” ਉਹ ਫਿਰ ਸੁਲਗ ਉੱਠਦਾ ਹੈ।
           “…ਤਾਂ ਫਿਰ ਰਘੁ ਵੀ ਨੌਕਰੀ ਤੋਂ ਹਟ ਜਾਵੇਗਾ, ਆਪਣੇ ਆਪ ਈ। ਕਿਉਂਕਿ ਰਘੁ ਦੀ ਨੌਕਰੀ ਨਿੱਕੀ ਕਰਕੇ ਈ ਡੇਲੀ ਬੇਸਿਜ ’ਤੇ ਚੱਲ ਰਹੀ ਐ…ਉਸਨੂੰ ਕਦੇ ਵੀ ਹਟਾਇਆ ਜਾ ਸਕਦੈ।” ਉਹ ਠੰਡੀ ਆਵਾਜ਼ ਵਿਚ ਬੋਲੇ।
           ਅਚਾਨਕ ਉਸਨੂੰ ਲੱਗਾ ਜਿਵੇਂ ਉਹਦੀਆਂ ਰਗਾਂ ਵਿਚ ਖੂਨ ਜੰਮ ਜਿਹਾ ਗਿਆ ਹੋਵੇ।
                                                        -0-

2. ਮਿਹਨਤ

          “ਗੁੱਡ ਮਾਰਨਿੰਗ ਸਰ!”
          ਉਹ ਚੌਂਕ ਗਏ। ਬਿਸਕੁਟ ਖਾਣ ਲਈ ਉੱਠਿਆ ਹੱਥ, ਜਿੱਥੇ ਸੀ ਉੱਥੇ ਹੀ ਰਹਿ ਗਿਆ, “ਮਾਰਨਿੰਗ!”
          “ਸ਼ਾਇਦ ਤੁਸੀਂ ਮੈਨੂੰ ਪਛਾਣਿਆ ਨਹੀਂ ਸਰ!” ਸਾਹਮਮੇ ਖਡ਼ਾ ਨੌਜਵਾਨ ਬੋਲਿਆ।
          ਉਹਨਾਂ ਦੇਖਿਆ–ਦੋ ਸਟਾਰ ਲਾਈ ਤੇ ਹੱਥ ਵਿਚ ਕੈਪ ਫਡ਼ੀ ਇਕ ਨੌਜਵਾਨ ਪੁਲਿਸ ਦੀ ਵਰਦੀ ਪਾਈ ਖਡ਼ਾ ਹੈ। ਕੌਣ ਹੈ? ਦਿਮਾਗ ਉੱਤੇ ਜ਼ੋਰ ਪਾਇਆ, ਫਿਰ ਵੀ ਯਾਦ ਨਹੀਂ ਆਇਆ। ਉਹਨਾਂ ਦੀ ਨਿਗ੍ਹਾ ਫਿਰ ਤੋਂ ਉਠੀ, ਛੋਟੀ ਜਿਹੀ ਨੇਮ ਪਲੇਟ ਲੱਗੀ ਹੈ,      ਕਮੀਜ ਦੀ ਜੇਬ ਉੱਤੇ–ਜੇ. ਐਸ. ਸਿੰਘ। ਪਰੰਤੂ ਫਿਰ ਵੀ ਕੁਝ ਯਾਦ ਨਹੀਂ ਆਇਆ।
          “ਸਰ! ਜਦੋਂ ਛੋਟਾ ਸੀ, ਅਖਬਾਰ ਵੇਚਦਾ ਹੁੰਦਾ ਸੀ। ਮਾਂ ਕੰਮ ਕਰਨ ਆਉਂਦੀ ਸੀ ਤੁਹਾਡੇ ਘਰ…ਬਿਲਾਸਪੁਰ ਵਿਚ।”
          “ਅੱਛਾ-ਅੱਛਾ, ਯਾਦ ਆਇਆ। ਬਹੁਤ ਵੱਡੇ ਹੋ ਗਏ। ਅੱਜ ਇੱਧਰ ਕਿਵੇਂ?” ਉਹ ਬੋਲੇ।
          “ਮੈਂ ਪੁਲਿਸ ’ਚ ਆਂ ਤੇ ਮੇਰੀ ਬਦਲੀ ਇਸ ਸ਼ਹਿਰ ’ਚ ਹੋਈ ਐ।” ਨੌਜਵਾਨ ਉਤਸ਼ਾਹਿਤ ਹੁੰਦਾ ਬੋਲਿਆ।
          “…ਤੇ ਤੇਰੀ ਮਾਂ?”
          “ਗੁਜ਼ਰ ਗਈ ਸਰ!…ਬਹੁਤ ਪਹਿਲਾਂ। ਇਕੱਲਾ ਹਾਂ। ਯਾਦ ਹੈ ਸਰ, ਇਕ ਵਾਰ ਤੁਸੀਂ ਕਿਹਾ ਸੀ– ਅਖਬਾਰ ਵੇਚਣਾ ਛੱਡ, ਪਡ਼੍ਹਾਈ ਕਰ। ਆਦਮੀ ਬਣ ਜੇਂਗਾ। ਤੁਹਾਡੀ ਗੱਲ ਯਾਦ ਰੱਖੀ ਸਰ। ਅਖਬਾਰ ਵੀ ਵੇਚੇ, ਪਡ਼੍ਹਾਈ ਵੀ ਕੀਤੀ। ਹੁਣ ਪੁਲਿਸ ’ਚ ਇੰਸਪੈਕਟਰ ਹਾਂ। ਸਭ ਤੁਹਾਡਾ ਆਸ਼ੀਰਵਾਦ ਐ। ਤੁਹਾਡਾ ਪਤਾ ਲੱਗਾ ਕਿ ਇੱਥੇ ਓਂ ਤਾਂ ਆ ਗਿਆ, ਫਿਰ ਤੋਂ ਤੁਹਾਡਾ ਆਸ਼ੀਰਵਾਦ ਲੈਣ।” ਕਹਿੰਦਾ ਹੋਇਆ ਨੌਜਵਾਨ ਉਹਨਾਂ ਦੇ ਪੈਰਾਂ ਵਿਚ ਝੁਕ ਗਿਆ।
           ਉਹਨਾਂ ਦਾ ਮਨ ਭਰ ਆਇਆ–ਕਾਸ਼! ਮੇਰਾ ਦਿਨੇਸ਼ ਵੀ ਅਜਿਹਾ ਹੀ ਨਿਕਲ ਜਾਂਦਾ। ਆਵਾਰਾਗਰਦੀ ਤੋਂ ਫੁਰਸਤ ਮਿਲੇ ਤਾਂ ਨਾ। ਤੇ ਹੌਲੀ-ਹੌਲੀ ਉਹਨਾਂ ਦੀਆਂ ਅੱਖਾਂ ਗਿੱਲੀਆਂ ਹੋਣ ਲੱਗੀਆਂ।
                                                        -0-

3. ਪਰਛਾਵੇਂ

           ਤਿੰਨੋਂ ਮੇਜ ਉੱਤੇ ਰੱਖੀ ਪਲੇਟ ਵਿੱਚੋਂ ਕਾਜੂ ਤੇ ਨਮਕੀਨ ਖਾਂਦੇ ਜਾ ਰਹੇ ਸਨ। ਤੇ ਹੱਥ ਵਿਚ ਫਡ਼ੇ ਸ਼ਾਨਦਾਰ ਗਲਾਸਾਂ ਵਿਚ ਭਰੀ ਮਹਿੰਗੀ ਸ਼ਰਾਬ ਪੀ ਰਹੇ ਸਨ। ਅੱਧੀ ਤੋਂ ਜ਼ਿਆਦਾ ਖਾਲੀ ਬੋਤਲ ਮੇਜ ਦੇ ਖੂੰਜੇ ਵਿਚ ਪਈ ਸੀ। ਰਾਤ ਗਹਿਰਾ ਰਹੀ ਸੀ ਤੇ ਨਾਲ ਨਾਲ ਤਿੰਨਾਂ ਦਾ ਨਸ਼ਾ ਵੀ।
           “ਫਿਰ?” ਨੇਤਾ ਬੋਲਿਆ।
           “ਲਗਭਗ ਚਾਲੀ ਲੋਕਾਂ ਦੀ ਭੀਡ਼ ਜੁਟ ਗਈ ਸੀ।” ਥਾਣੇਦਾਰ ਨੇ ਦੱਸਿਆ।
           “ਉਸ ਤੋਂ ਬਾਦ?” ਰਈਸ ਨੇ ਪੁੱਛਿਆ।
           “ਸਾਰੇ ਗੁੱਸੇ ’ਚ ਸਨ। ਅੱਗ ਉਗਲ ਰਹੇ ਸਨ। ਉਨ੍ਹਾਂ ਸਾਰਿਆਂ ਸਾਹਮਣੇ ਕਰਮੋ ਸੀ…ਨਾਲ ਉਹਦੀ ਮਾਂ ਤੇ ਉਹਦਾ ਭਰਾ ਵੀ ਸੀ। ਭਰਾ ਦੀਆਂ ਅੱਖਾਂ ’ਚ ਖੂਨ ਸੀ।”
           “ਤੁਸੀਂ ਕੀ ਕੀਤਾ?”
           “ਪਹਿਲਾਂ ਤਾਂ ਬਹੁਤ ਸਮਝਾਇਆ, ਫਿਰ ਡਰਾਇਆ…ਧਮਕਾਇਆ, ਪਰ ਉਨ੍ਹਾਂ ਦੀ ਜਿੱਦ ਸੀ ਕਿ ਰਿਪੋਰਟ ਲਿਖਣੀ ਈ ਪਊਗੀ।”
            “ਸਾਲੇ…ਜਾਹਿਲ…ਗੰਵਾਰ…!”
            “ਮੈਂ ਵੀ ਕੋਰੇ ਕਾਗਜ਼ ਤੇ ਲਿਖਕੇ ਬੇਵਕੂਫ ਬਣਾ ਦਿੱਤਾ। ਬਾਦ ’ਚ ਕਾਗਜ਼ ਦੇ ਟੋਟੇ ਟੋਟੇ ਕਰਤੇ। ਪਰ ਇਕ ਗੱਲ ਐ ਸੇਠ ਜੀ…।”
            “ਕੀ?” ਰਈਸ ਨੇ ਪੁੱਛਿਆ।
            “ਰਾਕੇਸ਼ ਬੇਟੇ ਨੂੰ ਜ਼ੋਰ ਜਬਰਦਸਤੀ ਨਹੀਂ ਕਰਨੀ ਚਾਹੀਦੀ ਸੀ…ਬਹਿਲਾ-ਫੁਸਲਾ ਕੇ ਲਾਈਨ ਤੇ ਲੈ ਆਉਂਦਾ ਕਰਮੋ ਨੂੰ…।” ਥਾਣੇਦਾਰ ਬੋਲਿਆ।
             “ਹਰਾਮੀ ਦਾ ਪਿੱਲਾ…ਬੇਵਕੂਫ ਐ” ਰਈਸ ਨੇ ਭੈਡ਼ਾ ਜਿਹਾ ਮੂੰਹ ਬਣਾਇਆ।
ਤਿੰਨੋਂ ਜ਼ੋਰ ਨਾਲ ਹੱਸੇ।
              “ਸਾਰੀ ਗਲਤੀ ਰਾਕੇਸ਼ ਦੀ ਐ। ਇਹ ਆਦਿਵਾਸੀ ਬਹੁਤ ਭੋਲੇ ਹੁੰਦੇ ਨੇ। ਇਨ੍ਹਾਂ ਦੀ ਜਗ੍ਹਾ ਜੇਕਰ ਦੂਜੇ ਹੁੰਦੇ ਤਾਂ…।” ਥਾਣੇਦਾਰ ਹਨੇਰੇ ਵਿਚ ਦੇਖਦਾ ਹੋਇਆ ਬੋਲਿਆ।
               ਅਚਾਨਕ ਉਹਦੀ ਨਿਗ੍ਹਾ ਦੀਵਾਰ ਉੱਤੇ ਪਈ। ਉਸਨੂੰ ਲੱਗਾ ਕਿ ਸਵੇਰ ਵਾਲੀ ਚਾਲੀ ਆਦਮੀਆਂ ਦੀ ਭੀਡ਼ ਦੇ ਹੱਥ ਮਸ਼ਾਲਾਂ ਦੇ ਰੂਪ ਵਿਚ ਉੱਪਰ ਉੱਠੇ ਹੋਏ ਹਨ…ਪਤਾ ਨਹੀਂ ਕਿਉਂ ਉਹਦਾ ਮਨ ਖੌਫ਼ਜ਼ਦਾ ਹੋਣ ਲੱਗਾ।
                                                        -0-

4. ਪੱਧਰ

             “ਸਰ, ਹੁਣ ਤਾਂ ਤੁਸੀਂ ਮੇਰਾ ਕੇਸ ਸਮਝ ਹੀ ਗਏ ਹੋਵੋਂਗੇ?”
             “ਹਾਂ।” ਉਹ ਐਨਕ ਦੇ ਪਿੱਛੋਂ ਨਜ਼ਰਾਂ ਨੀਵੀਆਂ ਕਰ ਫਾਈਲ ਉੱਪਰ ਕੁਝ ਲਿਖਦੇ ਹੋਏ ਬੋਲੇ।
             “ਸਰ, ਸੱਚਮੁਚ ਹੀ ਮੈਂ ਬਹੁਤ ਪਰੇਸ਼ਾਨ ਹਾਂ।”
             “ਫਿਰ?”
             “ਪਲੀਜ!…ਹੈਲਪ ਮੀ ਸਰ!”
             ਉਹ ਕੁਝ ਨਹੀਂ ਬੋਲੇ। ਫਾਈਲ ਵਿਚ ਕੁਝ ਲਿਖਦੇ ਰਹੇ। ਉਹ ਉਹਨਾਂ ਸਾਹਮਣੇ ਖਡ਼ਾ ਸੀ।
             “ਜੋ ਹੋ ਸਕਿਆ ਕਰ ਦਿਆਂਗਾ।” ਉਹਨਾਂ ਨੇ ਸਿਗਰਟ ਦਾ ਕਸ਼ ਖਿੱਚਦੇ ਹੋਏ ਧੂਆਂ ਛੱਡਿਆ।
             ਥੋਡ਼ੀ ਦੇਰ ਸ਼ਾਂਤੀ ਛਾਈ ਰਹੀ।
             “ਤੁਸੀਂ ਨੇਹਾ ਦੇ ਡੈਡੀ ਹੋ ਨਾ?” ਉਹ ਗੱਲ ਜਾਰੀ ਰੱਖਣ ਲਈ ਬੋਲਿਆ।
             “ਹਾਂ।”
             “ਮੈਂ ਵਿਨੋਦ ਹਾਂ…ਨੇਹਾ ਦਾ ਕਲਾਸਮੇਟ।”
             “ਰਿਅਲੀ!”
             “ਯਸ ਸਰ।”
             “ਨੇਹਾ ਨੇ ਦੱਸਿਆ ਸੀ ਤੁਹਾਡੇ ਬਾਰੇ…ਕਈ ਵਾਰ।…ਮੋਸਟ ਬ੍ਰਿਲੀਐਂਟ…ਸਕਾਲਰਸ਼ਿਪ ਹੋਲਡਰ…ਵੈਰੀ ਗੁੱਡ!”
             “ਤੁਹਾਡਾ ਆਸ਼ੀਰਵਾਦ ਹੈ ਸਰ!”
             “ਖਡ਼ੇ ਕਿਉਂ ਹੋ, ਬੈਠ ਜਾਓ।” ਉਹਨਾਂ ਨੇ ਕੁਰਸੀ ਵੱਲ ਇਸ਼ਾਰਾ ਕਰਦੇ ਹੋਏ ਕਿਹਾ। ਉਹ ਬੈਠ ਗਿਆ। ਉਹਨਾਂ ਉਸ ਵੱਲ ਦੇਖਦੇ ਹੋਏ ਸੋਚਿਆ– ਕੀ ਬੁਰਾ ਹੈ ਵਿਨੋਦ…ਨੇਹਾ ਤੇ ਵਿਨੋਦ ਇਕ ਦੂਜੇ ਨੂੰ ਚਾਹੁੰਦੇ ਵੀ ਹਨ।
              “ਮੈਂ ਕੰਮ ਕਰ ਦਿਆਂਗਾ।”
              “ਥੈਂਕਯੂ ਸਰ!…ਮੈਂ ਇੱਥੇ ਕਿਸੇ ਨੂੰ ਜਾਣਦਾ ਤੱਕ ਨਹੀਂ। ਚਾਰ ਦਿਨਾਂ ਤੋਂ ਚੱਕਰ ਕੱਟ ਰਿਹਾ ਹਾਂ।”
              ਥੋਡ਼ੀ ਦੇਰ ਚੁੱਪ ਰਹਿਣ ਮਗਰੋਂ ਉਹਨਾਂ ਨੇ ਪੁੱਛਿਆ, “ਘਰ ’ਚ ਕੌਣ-ਕੌਣ ਹੈ?”
              “ਤਿੰਨ ਛੋਟੇ ਭਰਾ, ਇਕ ਛੋਟੀ ਭੈਣ, ਪਿਤਾ ਜੀ, ਮਾਤਾ ਜੀ ਤੇ ਮੈਂ।”
              “ਪਿਤਾ ਜੀ ਕੀ ਕਰਦੇ ਹਨ?”
              “ਜੀ, ਮਿਡਲ ਸਕੂਲ ’ਚ ਹੈਡਮਾਸਟਰ ਹਨ।”
              “ਹੈਡਮਾਸਟਰ!”
              “ਯੈਸ।”
              “ਓਹ!” ਉਹ ਸਿਗਰਟ ਦੇ ਗੁਲ ਨੂੰ ਐਸ਼ਟ੍ਰੇ ਵਿਚ ਝਾਡ਼ਕੇ ਫਿਰ ਤੋਂ ਫਾਈਲਾਂ ਵਿਚ ਗੁਆਚ ਗਏ।
               ਅਚਾਨਕ ਕੁਰਸੀ ਉੱਤੇ ਬੈਠਾ ਹੋਇਆ ਉਹ ਆਪਣੇ ਆਪ ਵਿਚ ਹੀ ਸਿਮਟ ਗਿਆ।
                                                          -0-

Thursday, December 24, 2009

ਸੁਰੇਸ਼ ਸ਼ਰਮਾ





ਸ਼੍ਰੀ ਸੁਰੇਸ਼ ਸ਼ਰਮਾ ਹਿੰਦੀ ਲਘੁਕਥਾ ਦੇ ਚਰਚਿਤ ਹਸਤਾਖਰ ਹਨ। ਸਾਹਿਤ ਦੇ ਖੇਤਰ ਵਿਚ ਉਹਨਾਂ ਨੇ ਆਪਣੀ ਸ਼ੁਰੁਆਤ ਭਾਵੇਂ ਕਹਾਣੀ ਲੇਖਨ ਤੋਂ ਕੀਤੀ ਪਰ ਪਿਛਲੇ 25 ਵਰ੍ਹਿਆਂ ਤੋਂ ਵੀ ਵੱਧ ਸਮੇਂ ਤੋਂ ਉਹ ਲਘੁਕਥਾ ਦੇ ਖੇਤਰ ਵਿਚ ਕਾਰਜਸ਼ੀਲ ਹਨ। ਇਸ ਲੇਖਕ ਦੀਆਂ ਕੁਝ ਰਚਨਾਵਾਂ ਆਪਦੇ ਸਾਹਮਣੇ ਪੇਸ਼ ਕਰ ਰਿਹਾ ਹਾਂ।
******* 
ਜਨਮ : 6 ਮਈ, 1938 (ਇੰਦੌਰ)
ਸਿੱਖਿਆ : ਬੀ.ਏ., ਡਿਪਲੋਮਾ ਇਨ ਸਿਵਿਲ ਇੰਜਨੀਅਰਿੰਗ
ਮੌਲਿਕ ਪੁਸਤਕਾਂ : ‘ਛੋਟੇ ਲੋਗ’, ‘ਸ਼ੋਭਾ’, ‘ਥਕੇ ਪਾਂਵ’(ਕਹਾਣੀ ਸੰਗ੍ਰਹਿ) ‘ਤ੍ਰਿਵੇਣੀ’ (ਸਾਂਝਾ ਲਘੁਕਥਾ ਸੰਗ੍ਰਹਿ)
ਸੰਪਾਦਨਾ : ‘ਕਾਲੀ ਮਾਟੀ’, ’ਬੁਜ਼ੁਰਗ ਜੀਵਨ ਕੀ ਲਘੁਕਥਾਏ’ (ਲਘੁਕਥਾ ਸੰਗ੍ਰਹਿ), ‘ਸਮਾੰਤਰ’
ਪਤ੍ਰਿਕਾ ਦਾ ਜੁਲਾਈ-ਸਿਤੰਬਰ, 2001 ਦਾ ਲਘੁਕਥਾ ਵਿਸ਼ੇਸ਼ਾਂਕ ਅਤੇ ਚਾਰ ਕਹਾਣੀ ਸੰਗ੍ਰਹਿ
ਵਿਸ਼ੇਸ਼ : ਅਨੇਕਾਂ ਪੁਰਸਕਾਰਾਂ ਤੇ ਸਨਮਾਨਾਂ ਨਾਲ ਸਨਮਾਨਤ।
ਸੰਪਰਕ :235, ਕਲਰਕ ਕਾਲੋਨੀ, ਇੰਦੌਰ (ਮੱਧ ਪ੍ਰਦੇਸ਼)-452011
ਫੋਨ: (0731) 2553260 ਮੋਬਾਈਲ: 09926080810
*******
1. ਡੰਗ
ਰਾਤ ਦੀ ਉਨੀਂਦੀ, ਥੱਕੀ-ਹਾਰੀ ਰੇਸ਼ਮਾ ਕੋਠੇ ਦੀ ਖਿੜਕੀ ਵਿਚ ਬੈਠਕੇ ਸੜਕ ਉੱਤੇ ਆਉਣ ਜਾਣ ਵਾਲਿਆਂ ਨੂੰ ਦੇਖ ਰਹੀ ਸੀ। ਤਦ ਹੀ ਉਹਦੀ ਨਿਗਾਹ ਸਾਹਮਣੇ ਮਕਾਨ ਵਿਚ ਰਹਿਣ ਵਾਲੇ ਗੋਪਾਲ ਉੱਤੇ ਪਈ। ਨੋਟ ਗਿਣਨ ਤੋਂ ਬਾਦ ਸੰਤੁਸ਼ਟ ਹੁੰਦੇ ਹੋਏ ਗੋਪਾਲ ਨੇ ਆਪਣੀ ਗਾਂ ਦੀ ਵੱਛੀ ਦੀ ਰੱਸੀ ਖਰੀਦਦਾਰ ਦੇ ਹੱਥ ਫੜਾ ਦਿੱਤੀ। ਰੱਸੀ ਫੜ ਕੇ ਜਦੋਂ ਖਰੀਦਦਾਰ ਨੇ ਵੱਛੀ ਨੂੰ ਖਿੱਚਣਾ ਸ਼ੁਰੂ ਕੀਤਾ ਤਾਂ ਨਵੇਂ ਆਦਮੀ ਦੇ ਹੱਥ ਵਿਚ ਰੱਸੀ ਦੇਖ ਵੱਛੀ ਅੜ ਗਈ। ‘ਮਾਂ…ਮਾਂ…’ ਦੀ ਦਿਲ ਚੀਰਵੀਂ ਚੀਕ ਦੇ ਨਾਲ ਰੱਸੀ ਛੁਡਾ ਕੇ ਘਰ ਅੰਦਰ ਵੜਨ ਦੀ ਕੋਸ਼ਿਸ਼ ਕਰਨ ਲੱਗੀ। ਕਈ ਵਾਰ ਰੱਸੀ ਛੁਡਾ ਕੇ ਭੱਜਣ ਵਿਚ ਉਹ ਸਫਲ ਵੀ ਰਹੀ। ਪਰੰਤੂ ਉਹਦੇ ਘਰ ਅੰਦਰ ਜਾਣ ਤੋਂ ਪਹਿਲਾਂ ਹੀ ਖਰੀਦਦਾਰ ਫੇਰ ਰੱਸੀ ਫੜ ਕੇ ਖਿੱਚਣ ਲਗਦਾ। ਅੰਤ ਵਿਚ ਮਜਬੂਰ ਹੋ ਕੇ ਖਰੀਦਦਾਰ ਨੇ ਸੋਟੀ ਲੈਕੇ ਉਹਨੂ ਬੇਰਹਿਮੀ ਨਾਲ ਮਾਰਨਾ ਸ਼ੁਰੂ ਕਰ ਦਿੱਤਾ। ਮਦਦ ਲਈ ਉਹ ਗੋਪਾਲ ਵੱਲ ਵਧੀ। ਪਰ ਗੋਪਾਲ ਵੀ ਧੱਕਦੇ ਹੋਏ ਉਹਨੂੰ ਮਾਰਨ ਲੱਗਾ ਤਾਂ ਨਿਰਾਸ਼ ਹੋ ਕੇ ਹੰਝੂ ਵਹਾਉਂਦੀ ਉਹ ਚੁਪਚਾਪ ਨਵੇਂ ਮਾਲਕ ਨਾਲ ਤੁਰ ਪਈ।
ਰੇਸ਼ਮਾ ਦੀਆਂ ਅੱਖਾਂ ਵਿੱਚੋਂ ਹੰਝੂ ਵਹਿ ਤੁਰੇ। ਉਹ ਸਿਸਕਣ ਲੱਗੀ। ਉਹਦਾ ਇਹ ਹਾਲ ਦੇਖ ਕੇ ਨਾਲ ਦੀਆਂ ਕੁੜੀਆਂ ਨੇ ਹੈਰਾਨੀ ਨਾਲ ਪੁੱਛਿਆ, ਰੇਸ਼ਮਾ, ਕੀ ਹੋਇਆ? ਰੋ ਕਿਉਂ ਰਹੀ ਐਂ?
ਬਹੁਤ ਪੁੱਣ ਤੇ ਖੁਦ ਉੱਪਰ ਕਾਬੂ ਪਾਕੇ ਹੰਝੂ ਪੂੰਝਦੇ ਹੋਏ ਉਹਨੇ ਕਿਹਾ, ਕੁਝ ਨੀ ਅੜੀਏ! ਬਸ ਬਚਪਨ ਯਾਦ ਆ ਗਿਆ ਸੀ।
-0-
2. ਰਾਜਾ ਨੰਗਾ ਹੈ
ਰਾਜੇ ਨੇ ਆਪਣੇ ਮਤਹਿਤਾਂ ਨੂੰ ਬੁਲਾ ਕੇ ਕਿਹਾ, ਮੇਰੇ ਬਜ਼ੁਰਗ ਤੇ ਮੈਂ ਹਰ ਸਾਲ ਖਜ਼ਾਨੇ ਵਿੱਚੋਂ ਕਾਫੀ ਰਕਮ ਗਰੀਬਾਂ ਅਤੇ ਪਿਛੜੇ ਇਲਾਕੇ ਦੇ ਲੋਕਾਂ ਦੇ ਕਲਿਆਣ ਲਈ ਦਿੰਦੇ ਆਏ ਹਾਂ। ਮੈਂ ਇਕ ਦਿਨ ਪਿਛੜੇ ਇਲਾਕੇ ਵਿਚ ਜਾ ਕੇ ਦੇਖਣਾ ਚਾਹੁਂਦਾ ਹਾਂ ਕਿ ਤੁਸੀਂ ਅੱਜ ਤਕ ਕੀ ਕੀਤਾ ਹੈ।
ਮਤਹਿਤਾਂ ਵਿਚ ਘਬਰਾਹਟ ਫੈਲ ਗਈ। ਪਰੇਸ਼ਾਨ ਹੋ ਕੇ ਸਲਾਹ-ਮਸ਼ਵਰਾ ਕਰਨ ਲੱਗੇ। ਸੋਚਣ ਲੱਗੇ‘ਬੜਾ ਸਨਕੀ ਰਾਜਾ ਹੈ। ਅੱਜ ਤਕ ਇਸ ਦੇ ਪਿਓ-ਦਾਦਾ ਨਹੀਂ ਗਏ। ਹੁਣ ਇਹ ਜਾਵੇਗਾ ਪਿਛੜੇ ਇਲਾਕਿਆਂ ਵਿਚ!
ਰਾਜਾ ਨਿਰਧਾਰਤ ਦਿਨ ਉੱਤੇ ਆਪਣੇ ਮਤਿਹਤਾਂ ਨਾਲ ਇਕ ਪਿੰਡ ਵਿਚ ਜਾ ਪਹੁੰਚਿਆ। ਉਹ ਲੋਕਾਂ ਨੂੰ ਦੇਖ ਕੇ ਖੁਸ਼ ਹੋਇਆ ਕਿ ਸਭਨਾਂ ਨੇ ਸਾਫ-ਸੁਥਰੇ ਕਪੜੇ ਪਾਏ ਹੋਏ ਸਨ। ਪਿਡ ਵਿਚ ਪੱਕੀਆਂ ਸੜਕਾਂ ਸਨ। ਬਿਜਲੀ ਸੀ। ਸਕੂਲ ਸੀ। ਰਾਜਾ ਖੁਸ਼ ਹੋਇਆ ਕਿ ਉਸ ਦੇ ਰਾਜ ਵਿਚ ਸਭ ਖੁਸ਼ਹਾਲ ਹਨ।
ਤਦੇ ਰਾਜਾ ਨੇ ਆਪਣੇਪਣ ਨਾਲ ਪੁੱਛਿਆ, ਤੁਹਾਨੂੰ ਕੋਈ ਤਕਲੀਫ ਹੋਵੇ ਤਾਂ ਦੱਸੋ?
ਡਰੀਆਂ ਹੋਈਆਂ ਨਜ਼ਰਾਂ ਨਾਲ ਸਾਰਿਆਂ ਨੇ ਮਤਹਿਤਾਂ ਦੀਆਂ ਘੂਰਦੀਆਂ ਅੱਖਾਂ ਵੱਲ ਦੇਖਿਆ ਤੇ ਸਹਿਮ ਗਏ।
ਤੁਸੀਂ ਦੱਸੋ ਬਜ਼ਰਗੋ, ਕੀ ਤਕਲੀਫ ਹੈ ਤੁਹਾਨੂੰ?ਰਾਜਾ ਨੇ ਇਕ ਬੁੱਢੇ ਦੇ ਮੋਢੇ ਉੱਤੇ ਹੱਥ ਰਖਦਿਆਂ ਪੁੱਛਿਆ।
ਸਰਕਾਰ! ਇਹ ਦੋ-ਤਿੰਨ ਦਿਨ ਪਹਿਲਾਂ ਬਿਜਲੀ ਦੇ ਖੰਬੇ ਲੱਗੇ ਨੇ, ਬਸ ਹੁਣ ਕਨੈਕਸ਼ਨ ਮਿਲ ਜਾਵੇ ਤਾਂ ਪਿੰਡ ਵਿਚ ਰੋਸ਼ਨੀ ਹੋ ਜੂਗੀ।ਕੰਬਦੀ ਆਵਾਜ਼ ਵਿਚ ਬਜ਼ੁਰਗ ਨੇ ਕਿਹਾ ਤਾਂ ਰਾਜਾ ਦੇ ਮੱਥੇ ਉੱਤੇ ਵੱਟ ਪੈ ਗਏ ਤੇ ਮਤਹਿਤਾਂ ਦੇ ਮੱਥੇ ਉੱਤੇ ਪਸੀਨੇ ਦੀਆਂ ਬੂੰਦਾ ਉੱਭਰ ਆਈਆਂ।
ਫਿਰ ਰਾਜਾ ਨੇ ਇਕ ਬੁੱਢੀ ਔਰਤ ਨੂੰ ਪੁੱਛਿਆ, ਤੂੰ ਦੱਸ ਅੰਮਾਂ, ਤੂੰ ਕੀ ਚਾਹੁੰਦੀ ਐਂ?
ਸਾਰੇ ਪਿੰਡ ਨੂੰ ਜੋ ਇਹ ਕਪੜੇ ਵੰਡੇ ਗਏ ਨੇ, ਕਹਿੰਦੇ ਐ ਤੇਰੇ ਜਾਣ ਤੋਂ ਬਾਦ ਲੁਹਾ ਲੈਣਗੇ। ਅਸੀਂ ਬੁੱਢੇ ਤੇ ਬੱਚੇ ਤਾਂ ਬਿਨਾ ਕਪੜਿਆਂ ਤੋਂ ਰਹਿ ਲਾਂਗੇ। ਸਾਨੂੰ ਤਾਂ ਆਦਤ ਪੈ ਗੀ ਐ। ਪਰ ਪਿੰਡ ਦੀਆਂ ਜਵਾਨ ਨੂੰਹਾਂ-ਧੀਆਂ ਦੇ ਕਪੜੇ ਨਾ ਲੁਹਾਉਣਾ, ਉਹਨਾਂ ਨੂੰ ਨੰਗੀਆਂ ਨਾ ਕਰ ਦੇਣਾ, ਮਾਲਕ। ਇਹੀ ਬੇਨਤੀ ਐ ਸਰਕਾਰ!
ਬਜ਼ੁਰਗ ਔਰਤ ਦੀ ਪੂਰੀ ਗੱਲ ਸੁਣਕੇ ਰਾਜਾ ਰੋਣ-ਹਾਕਾ ਹੋ ਗਿਆ। ਦੁਖੀ ਹੋਇਆ ਹੋਲੀ ਜਿਹੇ ਬੋਲਿਆ, ਮੈਂ ਕਿਸੇ ਨੂੰ ਕੀ ਨੰਗਾ ਕਰਾਂਗਾ ਅੰਮਾਂ, ਮੈਂ ਤਾ ਆਪ ਹੀ ਨੰਗਾ ਹੋ ਗਿਆ ਹਾਂ।
-0-
3. ਪਿਤਾ-ਪ੍ਰੇਮ
ਬੇਟੇ ਨੇ ਉਹਨਾਂ ਨੂੰ ਸਾਬਨ ਨਾਲ ਨੁਹਾਇਆ। ਕਪੜੇ ਬਦਲੇ। ਨੂੰਹ ਨੇ ਨਾਸ਼ਤੇ ਵਿਚ ਕੜਾਹ ਤੇ ਦੁੱਧ ਦਿੱਤਾ। ਤਦ ਉਹਨਾਂ ਦੀ ਸਮਝ ਵਿਚ ਆਇਆ ਕਿ ਅੱਜ ਪੈਨਸ਼ਨ ਮਿਲਣ ਦਾ ਦਿਨ ਹੈ।
ਹੱਟਾ ਕੱਟਾ ਪੁੱਤਰ ਉਹਨਾਂ ਨੂੰ ਬਾਹਾਂ ਵਿਚ ਚੁੱਕ ਕੇ ਪੈਨਸ਼ਨ ਖਿੜਕੀ ਤਕ ਲੈ ਗਿਆ। ਫਾਰਮ ਉੱਤੇ ਉਹਨਾਂ ਦੇ ਨਾਂ ਸਾਹਮਣੇ ਕੰਬਦਾ ਹੱਥ ਫੜਕੇ ਅੰਗੂਠਾ ਲੁਆਇਆ। ਫਿਰ ਖੁਸ਼ ਹੁੰਦਿਆਂ ਨੋਟ ਗਿਣਕੇ ਜੇਬ ਵਿਚ ਰੱਖੇ ਤੇ ਰਿਕਸ਼ਾ ਵਾਲੇ ਨੂੰ ਕਿਹਾ, ਪਿਤਾ ਜੀ ਨੂੰ ਆਰਾਮ ਨਾਲ ਘਰ ਛੱਡ ਦੀਂ।
ਸੁਖੀ ਰਹਿ ਬੇਟੇ! ਅੱਜ ਦੇ ਜ਼ਮਾਨੇ ’ਚ ਕਿਹੜਾ ਬੇਟਾ ਬੁੱਢੇ ਬਾਪ ਦਾ ਏਨਾ ਖਿਆਲ ਰੱਖਦੈ। ਉਹਨਾਂ ਨੇ ਆਸ਼ੀਰਵਾਦ ਦਿੱਤਾ ਤੇ ਬੇਟੇ ਨੇ ਕੰਬਦਾ ਹੋਇਆ ਬੁੱਢਾ ਸਰੀਰ ਰਿਕਸ਼ੇ ਉੱਤੇ ਸੁੱਟ ਦਿੱਤਾ।
-0-
4.ਮੁਖੌਟੇ
ਜ਼ਮੀਨ-ਜਾਇਦਾਦ ਤੇ ਹੋਰ ਪਰਿਵਾਰਕ ਝਗੜਿਆਂ ਕਾਰਨ ਦੋਹਾਂ ਭਰਾਵਾਂ ਵਿਚ ਬੋਲਚਾਲ ਬੰਦ ਸੀ। ਇੱਥੋਂ ਤਕ ਕਿ ਦੋਹਾਂ ਨੇ ਇਕ ਦੂਜੇ ਦੀ ਸ਼ਕਲ ਤਕ ਨਾ ਵੇਖਣ ਦੀ ਸਹੁੰ ਖਾਈ ਹੋਈ ਸੀ। ਰਿਸ਼ਤੇਦਾਰਾਂ, ਮਿੱਤਰਾਂ ਤੇ ਜਾਣਕਾਰਾਂ ਦੀਆਂ ਉਹਨਾਂ ਵਿਚ ਮੇਲਜੋਲ ਕਰਾਉਣ ਦੀਆਂ ਸਾਰੀਆਂ ਕੋਸ਼ਿਸ਼ਾਂ ਅਸਫਲ ਰਹੀਆਂ। ਵੱਡਾ ਭਰਾ ਗੰਭੀਰ ਬੀਮਾਰੀ ਕਾਰਨ ਹਸਪਤਾਲ ਵਿਚ ਭਰਤੀ ਰਿਹਾ। ਤਦ ਲੋਕਾਂ ਦੇ ਸਮਝਾਉਣ ਦੇ ਬਾਵਜੂਦ ਵੀ ਛੋਟਾ ਪੰਜ-ਦਸ ਰੁਪਏ ਦਾ ਫਰੂਟ ਲੈ ਕੇ ਭਰਾ ਨੂੰ ਮਿਲਣ ਨਹੀਂ ਗਿਆ। ਅੰਤ ਛੋਟੇ ਨੂੰ ਮਿਲਣ ਦੀ ਇੱਛਾ ਮਨ ਵਿਚ ਲਈ ਵੱਡਾ ਭਰਾ ਇਕ ਦਿਨ ਚੱਲ ਵਸਿਆ।
ਘਰ ਅੰਦਰ ਚੀਕ-ਚਿਹਾੜਾ ਮੱਚਿਆ ਹੋਇਆ ਸੀ। ਬਾਹਰ ਅੰਤਮ-ਯਾਤਰਾ ਦੀ ਤਿਆਰੀ ਚੱਲ ਰਹੀ ਸੀ। ਲੋਕ ਦੁਖੀ ਮਨ ਨਾਲ ਖੜੇ ਸਨ। ਤਦ ਹੀ ਛੋਟਾ ਭਰਾ ਰੋਂਦਾ ਹੋਇਆ ਤੇਜ਼ੀ ਨਾਲ ਆਇਆ ਤੇ ਲਗਭਗ ਲਾਸ਼ ਉੱਤੇ ਡਿੱਗਦਾ ਹੋਇਆ ਦਹਾੜਾਂ ਮਾਰ ਕੇ ਰੋਣ ਲੱਗਾ, ਵੀਰ ਜੀ! ਇਉਂ ਚੁਪਚਾਪ ਕਿਓਂ ਲੇਟੇ ਹੋਏ ਓ? ਆਪਣੇ ਛੋਟੂ ਨਾਲ ਨਹੀਂ ਬੋਲੋਗੇ ਕੀ? ਇਹ ਜ਼ਮੀਨ-ਜਾਇਦਾਦ, ਧਨ-ਦੌਲਤ ਸਭ ਤੁਸੀਂ ਲੈ ਲਓ ਵੀਰ ਜੀ। ਬੋਲਦੇ ਕਿਓਂ ਨਹੀਂ ਹੋ? ਬੋਲੋ ਨਾ ਵੀਰ ਜੀ। ਕੀ ਇਸੇ ਲਈ ਆਪਣੇ ਛੋਟੇ ਨੂੰ ਪਾਲ ਪੋਸ ਕੇ, ਪੜ੍ਹਾ-ਲਿਖਾ ਕੇ ਵੱਡਾ ਕੀਤਾ ਸੀ ਕਿ ਇਸ ਤਰ੍ਹਾਂ ਰੁੱਸ ਕੇ ਚਲੇ ਜਾਓ।…
ਜ਼ੋਰ ਜ਼ੋਰ ਨਾਲ ਆਉਂਦੀ ਛੋਟੇ ਭਰਾ ਦੀ ਆਵਾਜ਼ ਸੁਣ ਕੇ ਬਾਹਰ ਖੜੇ ਲੋਕਾਂ ਦੇ ਦੁਖੀ ਚਿਹਰਿਆਂ ਉੱਤੇ ਵੀ ਮੁਸਕਾਨ ਤੈਰ ਗਈ।
-0-